(AP) – Pashentnan cu wowo tapa y mannan mara ta drumi riba decenas di cama bao un tent den desierto. Operacionnan ta ser haci sin anestesia apropia cu dokternan cu ta keda anonimo.
Esaki ta algun di e condicionnan na Israel su unico hospital dedica na duna tratamento na detenidonan di Palestina di parti di e ehercito na Gaza Strip, 3 persona cu a traha aki a conta The Associated Press, confirmando acusacionnan similar di gruponan cu ta boga pa derechonan humano.
Mientras Israel ta bisa cu nan ta detene solamente personanan cu ta sospecha di ta militante, hopi di e pashentnan a resulta di ta personanan cu no a participa den e combate durante inval, sin un huicio y eventualmente mester bolbe back na Gaza.
8 luna despues cu e guera entre Israel y Hamas a cuminsa, acusacionnan di trato inhumano na Sde Teiman su hospital militar ta keda aumenta, y e gobierno si Israel ta bao presion cu ta keda crece pa cera esaki. Gruponan di derecho y otro criticonan ta bisa cu loke a cuminsa como un sitio temporario pa detene y duna tratamento na e militantenan a bira un centro di detencion cu no ta para responsabel pa su accionnan.
E ehercito ta nenga e acusacionnan di trato inhumano y ta bisa cu tur detenido cu tin mester di atencion medico ta ricibi esaki. E hospital ta cerca di e ciudad di Beersheba na Israel. El a habri banda di un centro di detencion riba un base militar despues di e atake di dia 7 di october ana pasa pa motibo cu e hospitalnan di civilnan a nenga duna tratamento na e militantenan herida.
Di e 3 empleado cu AP a entrevista, dos a papia bao condicion di anonimidad pa motibo cu nan tin miedo di vengansa di gobierno y acoso di e publico.
“Nos ta condena pa motibo cu nos no ta cumpli cu problemanan etico,” Dr. Yoel Donchin, un anestesiologo cu a traha na e hospital desde su dianan trempan y te ainda ta traha aki a comenta. “Nos ta condena di otro banda pa motibo cu nan ta pensa nos ta criminal a causa di duna terorista tratamento.”
E ehercito e siman aki a bisa cu nan a forma un comite pa investiga e centro di detencion su condicionnan, pero no a keda cla si esaki lo inclui e hospital. Proximo siman Israel su corte mas halto lo tende argumentonan di gruponan cu ta boga pa derecho humano cu ta pidi su clausura.
Israel no a otorga reporteronan ni tampoco e comite internacional di Cruz Cora acceso na e facilidadnan di Sde Teiman.
Israel a detene mas o menos 4,000 Palestino desde dia 7 di october segun cifranan oficial, aunke alrededor di 1,500 a keda libera despues cu ehercito a determina cu nan no ta afilia cu Hamas. Gruponan di derechonan humano Israeli ta bisa cu e gran mayoria di e detenidonan na algun momento a pasa door di Sde Teiman, e pais su centro di detencion mas grandi.
