(AP) — Israel ayera a lansa su operacion militar mas intenso den West Bank den casi dos decada, ehecutando un serie di atake cu drone y mandando centenares di trupa riba un mision sin fin stipula den un sede militante. Al menos ocho Palestino a resulta morto y decenas herido.
E accion ta recorda di e tacticanan militar Israeli durante e segundo insureccion Palestino na comienso di añanan 2000, y a yega na un momento di presion domestico aumentando pa un respuesta mas pisa contra atakenan recien riba colonistanan Israeli, incluyendo un tiramento luna pasa cu a mata cuatro Israeli.
E operacion a tuma luga na campo di refugiado Jenin – un area den nort di West Bank cu pa largo ta conoci como un bastion di militantenan. E bataya, cu a cuminsa tiki despues cu mita anochi, a continua te despues di bahada di solo.
Durante e dia, huma preto a lanta for di e cayanan druk di e campo, un bario densamente pobla cu ta cas na como 14mil persona, mientras por a scucha intercambio di tiro y dronenan bulando ariba. Bulldozer militar a plama e cayanan estrecho, dañando edificio mientras nan a habri caminda pa forsanan Israeli.
Ehercito a blokea trafico pa y for di Jenin, y e ciudad tabata parce un ghost town. Cayanan tabata bashi mientras vehiculonan arma Israeli tabata patruya. Cantidad di taira na candela y bar’i sushi tabata yena circulonan di trafico. A corta suministro di awa y coriente na e campo.
Hobennan Palestino ocasionalmente a tira piedra riba vehiculonan militar prome cu core bay.
E Palestinonan, y tres pais Arabe cu lasonan normalisa cu Israel – Jordan, Egipto y Emirato Arabe Uni – a condena e incursion, igual cu e 57 nacion di Organisacion di Cooperacion Islamico.
Dialuna nochi, e liderazgo Palestino den West Bank a tene un reunion di emergencia y a bisa cu ta stop su contacto limita cu Israel. Lidernan a bisa cu un freeze den coordinacion di seguridad lo keda na lugar, y nan a priminti di escala actividad contra Israel den Nacionnan Uni y cuerponan internacional.
Nan tambe a plania pa minimisa contacto cu Merca.
Esaki no a crea mucho impacto cerca prome minister Israeli, Benjamin Netanyahu. “Den lunanan recien, Jenin a converti den un refugio pa terorismo. Nos ta cabando cu esaki,” el a bisa.
El a bisa cu e trupanan ta destruyendo centronan di comando militar y confiscando suministro y fabricanan di arma. El a bisa cu e operacion ta tumando lugar cu “daño minimo na civilnan.”
Rear Adm. Daniel Hagari, vocero principal militar, a bisa cu tabatin un total di 10 atake aereo, mayoria di nan enfoca riba mantene hombernan arma leu for di e trupanan riba tera. El a acusa militantenan di opera banda di un edificio di Nacionnan Uni y warda arma dentro di un moskee. El a bisa cu Israel a lansa e operacion pa motibo di como 50 atake den ultimo aña cu a bin for di Jenin.
Ni e prome minister di Hagari a duna indicacion na ki tempo e operacion ta bay caba.
