(AP) – Ehercito Israeli ayera dialuna a ordena evacuacion di parti di un area na Franha di Gaza cu a ser destina como zona humanitario y a anuncia cu tabatin plania cuminsa un operacion contra milicianonan di Hamas.
E orden a provoca un exodo nobo di Palestinonan, hopi di cual recientemente a bay busca refugio eynan den ultimo siman.
Miles di Palestino, hopi di nan cu tas y acompaña di muchanan, tabata cana na e camindanan yen di stof cu un sol hopi fuerte. Autonan kibra cu nan pertenencianan mara tabata maniobra entre edificionan destrui pa atakenan Israeli anterior. Hopi Palestino a bay busca seguridad durante e atake aereo y terestre Israeli.
“Nos no sa unda pa cana,” Kholoud Al Dadas a bisa mientras e tabata brasa su yiunan. “Esaki ta di shete biaha cu nos tin cu bay. Mientras nos tabata drumi na nos cas, nan a cuminsa tira y bombardia nos for di tur caminda.”
Como refleho di e reduccion di espacio pa Palestinonan, e orden nobo di evacuacion ta reduci den 10 kilometer cuadra e “zona humanitario” di 60 kilometer cuadra cu Israel a bin bisando na Palestinonan pa huy y asina scapa di e ofensiva.
E parti mayor di e zona nobo di evacuacion ta compronde partinan di e ciudad di Khan Yunis, cu ya caba na mei tabatin basta hende cu tabata huy di atakenan di trupanan Israeli na Rafah. Te awor no ta conoci e number di personanan cu ta den e zona di evacuacion, di acuerdo cu funcionarionan di ONU.
Ayera dialuna, un serie di atakenan aereo Israeli a cay cerca di Khan Yunis lagando atras por lo menos 70 persona morto, segun Ministerio di Salud di Gaza, basa den cifranan di Hospital Nasser cu a informa. Un video di The Associated Press a mustra un nubia riba e ciudad despues di un explosion. Otro atake a ser registra dilanti hospital Al-Aqsa na ciudad di Deir-Al-Balah—ubica na centro di e pais—na unda hopi hende tabata biba den tentnan instala den cayanan e cual a mata 1 persona y 3 a keda herido.
