Gran parti di Barbados a shut down ayera mientras tormenta tropical Dorian ta acerca e region y gana forsa, menasando pa converti den un horcan chikito, cual pronostico ta bisa por afecta e islanan nort Windward y Puerto Rico den proximo dianan.
Prome Minister, Mia Mottley a cera scol y oficina di gobierno na Barbados, advertiendo hende pa keda paden. “Ora bo ta morto, bo ta morto”, el a bisa den un discurso televisa diadomingo. “Keda paden y sosega.”
Centro di Horcan Nacional Mericano a manda advertencia di horcan pa St. Lucia y di tormenta tropical pa Barbados, Martinique, St. Lucia y St. Vincent y Grenadines. Tambe a duna advertencia di tormenta tropical pa Dominica, Grenada, Saba y St. Eustatius. Ta spera cu e tormenta lo basha yobida di 8 pa 20cm na Barbados y islanan cercano.
Na St. Lucia, Prome Minister Allen Chastanet a anuncia cu tur cos riba e isla di 179mil habitante lo ta shut down pa 4pm awe, cu e horcan spera pa alrededor di 2am diamars. “Nos ta preparando pa lo pio”, el a bisa.
Mientras tanto, na Barbados, hopi di e 285mil habitante a sigui advertencia di gobierno, incluyendo Fitz Bostic, doño di Rest Haven Beach Cottages. El a bisa cu e ta prepara en caso cu oficialnan corta coriente y servicionan di utilities manera nan a haci cu tormentanan anterior. “Nos mester ta cauteloso”, el a bisa.
Na Puerto Rico, teritorio Mericano, centenares di hende ta yenando supermercado y stacion di gasolin pa prepara pa Dorian, cumprando cuminda, awa y generador, entre otro necesidadnan. Hopi ta preocupa pa falta di coriente y yobida fuerte den un isla cu ainda ta luchando pa recupera di horcan Maria, cual a suta e isla casi dos aña atras.
Pronostico ta bisa e tormenta por pasa Puerto Rico diaranson y acerca Republica Dominicana anochi e mesun dia.
