IRS ta bisa cu Microsoft ta debe aproximadamente 29 biyon dollar den impuesto

(AP)—E Internal Revenue Service (IRS) a bisa cu Microsoft ta debe e Tesorero Mericano 28.9 biyon dollar den impuesto, plus penal y interes, segun e compania a revela diaranson.

E cifra ey, cual Microsoft ta nenga, ta bon for di un investigacion largo di IRS den con Microsoft ta aloca su ganashi entre pais- y hurisdiccionnan den e añanan 2004 pa 2013. Criticonan di e practica ey, conoci como “transfer pricing”, ta argumenta cu companianan sa uza e metodo aki pa minimalisa nan impuesto por medio di reporta menos ganashinan den paisnan cu impuesto mas halto y mas ganashi den hurisdiccionnan cu impuesto abao.

Microsoft, cual ta basa na Redmond, Washington, a bisa cu el a sigui cu e reglanan di IRS y lo apela e decision dentro di e agencia, un proceso cu por dura varios aña. E shares di e compania a cay un tiki den comercio “aftermarket.”

IRS a cuminsa cu un revision di Microsoft na 2007, cual e agencia a describi aña pasa den documentonan di corte federal como “un di e revision mas grandi den e historia di e servicio.” Microsoft ta bisa cu el a ser notifica recien pa IRS cu e revision a termina, cuminsando un proceso nobo pa resolve un disputo tocante con hopi e compania debe.

Parti di e investigacion a concentra riba con Microsoft a structura un facilidad di fabricacion cuminsando na 2005 den e teritorio Mericano di Puerto Rico. IRS a bisa cu Microsoft a contrata compania di accounting KPMG pa crea un areglo di compartimento di costo cu e afiliado Portoriqueño cu a dirigi ganashi cu por ta vulnerabel pa impuesto pafo di Merca.

IRS tambe a tuma un bista riba otro afiliadonan, incluyendo un cu a envolvi benta na Asia, segun e documentonan di corte. Un blog post diaranson di David Goff, e vice-presidente corporativo di Microsoft pa impuesto y inmigracion global, a bisa cu e compania a cambia su structura y practicanan corporativo desde e añanan cu a ser cubri pa e revision. Pero el a bisa tambe cu ta comun pa multinacionalnan grandi uza areglo di compartimento di costo, y cu pasobra e subsidiarionan di Microsoft a participa den e costonan di desaroyo di algun propiedad intelectual, nan tabatin derecho riba e ganashi tambe.

Goff a bisa cu e 28.9 biyon dollar busca pa IRS por reduci cu te cu 10 biyon dollar pa via di impuesto paga como resultado di un ley di impuesto na 2017 cu a ser firma pa ex-presidente Donald trump.