Durante weekend, Ministerio Publico (OM) di Hulanda a informa riba nan website cu Aduana na Rotterdam a haya 44 kilo di droga den un container bashi.
OM a informa cu un siman prome tabatin disturbio cu extractornan y personanan no autorisa di un empresa di container y carga na Maasvlakte, Rotterdam. Varios anochi a stop e extractornan y tambe a haci aresto di sospechosonan cu tabata laga e extractornan cerca di e lugar.
Pa e motibo aki, Aduana a dicidi di haci un inspeccion di e containernan cu tabatin na e zona di transferencia, usando cacho detector di droga y un scanner mobil, y mesora nan a haya algo.
OM a informa cu durante un inspeccion di un container bashi biniendo for di Aruba, nan a detecta iregularidad. Ora di habri pa inspeccion, e funcionarionan di Aduana a haya un par di tas di sport, y den esakinan tabatin bloki di cocaina.
Durante un inspeccion mas detaya, a haya tambe algun bloki los di cocaina den e parti patras di e container. Den e dos tas, agentenan di Aduana a retira 44 paki di substancianan estupefaciente for di e container, cu un balor riba caya di casi 3.5 miyon euro.
Team HARC, un asociacion di 27 aña entre Aduana, FIOD, polis portuario y fiscalia na Rotterdam, ta investigando e caso aki. A informa cu a destrui e droga cu a haya.
