E guardia revolucionario di Iran a tira un drone di vigilancia di Merca, memey di tension entre Tehran y Washington despues di e collapse di nan acuerdo nuclear.
E guardia a informa cu a tira RQ-4 Global Hawk, cu tin un balor di 100 miyon dollar y por bula leu y dura den aire pa mas cu 24 ora. Iran ta bisa cu e drone a ‘invadi’ nan espacio, pero Merca ta bisa cu e drone tabata den espacio internacional, y cu Iran a haci un ‘atake sin provocacion’.
Ehercito Mericano ta culpa Iran di e suceso di siman pasa, unda dos tanker a keda ataca, pero Tehran ta nenga esaki. E tension di ambos pais ta bin di aña pasa, ora cu Trump a retira di e trato nuclear cu Tehran. Iran a aumenta nan enrikecemento di uranio na nivel di arma, purbando di presiona Europa pa bin cu termino pa un acuerdo nuclear nobo.
President Vladimir Putin, di Rusia, a pidi precaucion y ta duna advertencia cu cualkier guera entre Iran y Merca cu lo bira un ‘catastrofe’ pa e region, como minimo. Na Iran nan ta bisa cu e drone a viola nan frontera di siguridad nacional. “Cualkier enemigo cu viola esaki lo wordo elimina”, segun ministerio di relacion di exterior a protesta contra e avion.
