(BBC)- Iran a lansa un atake cu decenas di misil contra Israel ayera diamars, mientras cu sirena di alarma a zona den henter e pais y autoridadnan a pidi ciudadanonan pa busca refugio y permanece sigur.
Despues di e atake, e Forsanan di Defensa di Israel (FDI) a bisa cu nan no tabata na altura di ningun lesion serio contra e poblacion y cu nan tabatin “permiso pa bandona espacio protehi den tur area di e pais.”
Durante e ofensiva Irani, a scucha explosionnan den e ciudad di Tel Aviv, den centro di e pais, y a mira proyectilnan ta bula riba e area, aunke mayoria a ser intercepta pa e sistemanan di defensa aereo Israeli, cu ayudo di barconan Mericano.
FDI a bisa cu Iran a lansa alrededor di 180 misil, mientras cu militarnan Mericano a pone e cantidad di proyectil na 200.
E atake Irani a sucede algun ora despues cu Israel a cuminsa un invasion na sur di Libanon cu e obhetivo di termina e capacidadnan di e milicia chiita Hezbollah, un aliado di Teheran.
Ayera television estatal Irani a emiti un comunicado di Cuerpo di Guardia Revolucionario Islamico (CGRI) confirmando cu “decenas” di misil a ser lansa den direccion di Israel y a menasa cu otro atake si e Israelinan responde.
CGRI a bisa cu atake di misil a ser realisa como represalia pa e asesinato di lider di Hamas Ismail Haniya na juli ultimo y tambe lider di Hezbollah Hassan Nasrallah diabierna ultimo, ademas di e mortonan di Libanesnan y Palestinonan.
Despues, presidente Irani Masoud Pezeshkian a bisa den un post riba medionan sosial ayera diamars cu Teheran a realisa “un contesta fuerte na agresion di e regimen sionista.”
“Iran no ta busca guera pero lo confronta cualkier menasa firmemente”, el a agrega.
“E atake lo tin consecuencia”
E vocero di FDI, Daniel Hagari, a bisa cu e atake Irani lo tin consecuencia. “Nos ta den alerta maximo, tanto defensivo como ofensivo. Nos lo defende e ciudadanonan di e Estado di Israel. E atake aki lo tin consecuencianan. Nos tin plannan y nos lo actua ki ora y unda nos dicidi,” Hagari a bisa.
Despues, Hagari a bisa cu Forsa Aereo di Israel “lo atacá poderosamente den Medio Oriente.”
“Iran a comete un acto serio awe nochi y ta pushando Medio Oriente den direccion di escalacion”, el a bisa.
Prome cu e lansamento di misil, Merca a afirma di tin indicacion cu Iran tabata preparando un atake inminente contra Israel, mientras forsanan Israeli a avansa cu nan invasion na sur di Libanon, cu a cuminsa den oranan di madruga di diamars.
Barconan di guera Mericano a intercepta algun di e misilnan cu a yega for di Iran, un vocero di Pentagono a bisa.
Presidente di Merca Joe Biden a sigura cu su pais ta prepara pa defende Israel contra atakenan di Iran.
Awor Israel lo ta tenta pa tuma represalia contra Iran hopi mas fuerte cu el a haci na april.
E tempo ey, despues di a lansa alrededor di 300 misil y drone irani como contesta na un atake israeli riba e consulado di Iran na DamasCo, tabatin un esfuerso diplomatico internacional pa evita cu Israel lo a reacciona cu hopi forsa.
