(AP) — Iran a lansa un raket cu un carrier di satelite transportando tres aparato den espacio, segun autoridadnan a anuncia ayera, sin bisa si algun di e obhetonan a drenta orbita terestre. No ta cla na ki momento e lansamento a tuma lugar ni ki aparatonan e carrier a trece cune.
Iran a transmiti imagen di e lansamento memey di negociacionnan na Vienna pa restaura e acuerdo nuclear di Tehran cu podernan mundial. Un di ocho ronda tabata na caminda e siman aki y ta programa pa resumi despues di celebracionnan di Aña Nobo.
Lansamentonan anterior a genera critica di Merca. Departamento di Estado Mericano, Forsa Espacial y e Pentagono no a responde inmediatamente na solicitudnan pa comentario riba e anuncio di Iran ayera.
Ahmad Hosseini, vocero di ministerio di Defensa, a identifica e raket como un Simorgh, of ‘Phoenix’, un raket cu a transporta e tres aparato 470 kilometer. “E prestacion di e centro espacial y di e carrier di e satelite a ser haci adecuadamente”, a cita Hosseini bisando.
Pero algun ora despues, Hosseini y otro oficialnan a permanece den silencio tocante e status di e obhetonan, sugeriendo cu e raket a no a logra pone su carga den e orbita corecto. Hosseini a ofrece un velocidad pa e carrier cu periodistanan asocia cu estado reportando riba e evento a indica no lo ta suficiente pa alcansa orbita.
Programa espacial civil Irani a sufri un serie di contratempo den añanan recien, incluyendo candelanan fatal y un explosion riba plataforma di lansamento cu a hala atencion di ex-presidente Donald Trump.
Medionan di comunicacion estatal Irani recientemente a ofrece un lista di lansamentonan di satelite planea proximamente pa e programa espacial civil di e Republica Islamico. Guardia Revolucionario paramilitar di Iran ta conduci su propio programa cu exitosamente a pone un satelite den orbita aña pasa. Hosseini a describi e lansamento anuncia ayera como ‘inicial’, indicando cu tin mas na caminda.
A mustra magennan transmiti riba television di e raket blanco cu e palabranan ‘Carrier di satelite Simorgh’ y e slogan ‘Nos Por’ bulando den shelo di mainta for di puerto espacial Imam Khomeini di Iran. Un reportero estatal na un sitio den desierto cercano a elogia e lansamento como ‘otro logro di cientificonan Irani’.
E lansamento a lanta preocupacion na Washington tocante si e tecnologia usa pa lansa satelite por avansa desaroyo di misil balistico di Iran. Merca ta bisa cu lansamentonan asina di satelite ta desafia un resolucion di Conseho di Seguridad di Nacionnan Uni dunando orden pa Iran keda leu di cualkier actividad relaciona na misil balistico capaz di transporta armanan nuclear.
Iran, cu pa largo a bisa cu no ta buscando armanan nuclear, ta insisti cu su lansamentonan di satelite y testnan di raket no tin un componente militar.
Anunciando un lansamento di raket mientras diplomaticonan ta lucha pa restaura e acuerdo atomico di Iran ta mantene e posicion duro di Tehran bao presidente Ebrahim Raisi, un clergo conservador recientemente eligi.
Exigencianan nobo di Iran den e negociacionnan nuclear a exaspera nacionnan occidental y a aumenta tensionnan regional mientras Tehran ta bay dilanti cu avancenan atomico. Diplomaticonan varios baiha a bati alarma cu tempo ta cabando pa restaura e acuerdo, cual a collapse tres aña pasa na momento cu Trump unilateralmente a retira Merca for di e acuerdo.
For di Vienna, negociador nuclear di Iran, Ali Bagheri Kani a bisa television estatal Irani cu e tin speransa cu diplomaticonan ta bay haci ‘trabao mas serio pa elimina sacnionnan’ na momento cu e negociacionnan reanuda proximo siman. El a describi e negociacionnan durante ultimo siman como ‘positivo’.
Washington, sinembargo, a tira awa friu riba evaluacionnan positivo di Tehran. Vocero di departamento di Estado, Ned Price a bisa reporteronan e siman aki cu ‘realmente ta demasiado pronto pa bisa si Iran a bolbe e ronda aki cu un maneho mas constructivo’.
Iran awo a bandona tur limitacion bao di e acuerdo, y a aumenta enrikecimento di uranium for di bao di 4% di puresa na 60% – un stap tecnico cortico for di nivelnan di grado di arma. Inspectornan internacional ta enfrenta retonan den monitoreo di avancenan di Tehran.
Durante ultimo decada, Iran a manda varios satelite di corto duracion den orbita, y na 2013 a lansa un macaco den espacio. Pero bao Raisi, gobierno ta parce di a reforsa su enfoke riba espacio. Conseho Supremo di Espacio di Iran a reuni pa prome biaha den 11 aña.
