E recien discusionnan tocante e contract entre WEB y Eagle LNG no ta atende adecuadamente e peligro cu LNG como fuente di energia por trece cune. Asina ingeniero Leopoldo Henriquez, experto Arubiano a bisa Bon Dia Aruba.

Nos redaccion a acerca Sr. Henriquez pa su opinion, basa riba su experiencia amplio riba entro otro e tereno di energia na Hulanda. Como un persona cu a traha riba e tereno aki, Sr. Henriquez a sigui e desaroyo cortico di Eagle LNG, e contracto cu mester duna hopi splicacion pero cu ma motibo di asina yama ‘non-disclosure agreements,’ esta NDA’s mester keda secreto pa e pueblo di Aruba cu de facto ta doño y cliente di WEB, cu ta encarga cu e tarea esencial di percura pa awa y coriente.

LNG como fuente di energia ta miho cu HFO

Segun ingeniero Henriquez, diferente gremio a trece dilanti cu si usa LNG en bes di HFO (Heavy Fuel Oil), “anto e emision di CO2 cu tin impacto ariba e cambio di clima lo ta considerablemente menos. E emision di substancianan nitrogeno (NOx ), sulfurico (SO2) y stof fini (masha peligroso y por causa cancer) cu tin impacto ariba e salubridad di hende y e integridad di material lo tambe ta menos. Tur esakinan ta corecto y no ta caba e duda cu esakinan ta bentahanan di e cambio di HFO pa cu LNG probablemente combina cu su prijs. E simple hecho cu LNG kimicamente tin menos carbon den su composicion compara cu HFO ta resulta den un emision di CO2 menos y tambe menos aire ta necesario pa kima LNG compara cu HFO cu resultado menos emision di e substancianan peligroso ya menciona.”

Pues riba su mes, uso di LNG den forma di gas en bes di HFO ta berdad miho pa medio ambiente.

“Loke ami como ingeniero cu experiencia ariba evaluacion di e riesgonan di uso di petroleo y gas ta mas preocupa ta cu compara cu HFO, e uso di LNG lo trece mas riesgo cune pa cu e seguridad y integridad di e instalacion di LNG. Primeramente esaki tin cu haber cu e caracteristicanan di LNG compara cu HFO. LNG ta simplemente mas flamante cu HFO. Esey kiermen cu LNG, si tin un incidente, por causa un candela of te hasta un explosion mas facil compara cu HFO.”

Hidrogeno ta un riesgo mas grandi pa explosion

Sr. Henriquez a sigui bisa cu den Bon Dia di diabierna 10 december 2021 pagina A3, Parlamentario Raymond Kamperveen di RAIZ ta señala cu ora bay usa LNG, anto mester tin super extra seguridad pa motibo cu LNG ta mas flamante. “Di otro banda ta conoci cu RAIZ ta boga pa mas pronto posibel pa cambia pa e uso hidrogeno (hydrogen) como fuente di energia.

Esaki ta menciona tambe den e Programa di Gobernacion di MEP y RAIZ pa cu 2021 – 2025. Remarcabel ta cu segun e caracteristicanan fisico y kimico e gas hidrogeno ta mas flamante cu LNG. Esey kiermen cu hidrogeno por causa candela y explosion mas facil y mas destructivo compara cu LNG y HFO.”

Desaroyo di LNG na Merca

Di otro banda, Sr. Henriquez ta hopi preocupa cu sin mas ta acepta uso di LNG na Aruba. “Mi preocupacion ta bay na un nivel alarmante ora cu mi ta lesa un publicacion den The Washington Post di 3 di juni 2021 (LNG export terminals play down risks of vapor cloud explosions, critics say – The Washington Post) unda recientemente ingenieronan na Merca a bati alarma tocante e posibilidad di explosionnan grandi cu por sosode door di cu na e pais, mas y mas nan ta trahando instalacionnan y tuberia nobo pa abastece y transporta LNG. America a bira un productor principal di gas LNG pa motibo di e tantisimo boramento y fracking cu a tuma luga.”

Vapor Cloud Explosion

Segun Henriquez, e mensahe esencial di e ingenieronan ta cu e autoridadnan no ta suficiente consciente cu e ora tin un lek di gas grandi, y e gas no por scapa di e facil ey combina cu un detonador anto esaki por causa un ‘vapor cloud explosion’ (VCE) cu un impacto hopi grandi riba e vecindario “te hasta cu e por destrui tur cos, te mas cu 100 meter leu di e origen di e explosion. Tambe e modelonan usa na America pa haci un evaluacion di e riesgonan no ta inclui tur e posibilidadnan pa calcula e scenarionan pa cu explosion ya menciona y e consecuencianan di esaki. Te hasta cu e autoridad di EUA, cu yama Pipeline and Hazardous Materials Safety Administration (PHMSA) cu ta pertenece na e U.S. Department of Transportation (Pipeline and Hazardous materials Safety Administration. gov ) e aña aki a duna ordo pa evalua e modelonan si esaki ta inclui tur scenario. A otorga un contract di 473.000 dollar Mericano pa haci e evaluacion aki. Y e resultado di e evaluacion aki lo ta cla na juni 2022 segun e website di PHMSA.”

Explosionnan grandi cu LPG y LNG

E experiencia di Leopoldo Henriquez ta basa riba su añanan cu el a traha na Europa riba e tereno di salubridad (Health), seguridad (Safety) y medio ambiente (Environment).

E modelonan di Europa ya ta adapta na loke PHMSA ta trahando ariba dje. Ya cu na Europa tabatin hopi incidente cu gas natural y LPG (cu ta gas petrolero likido) caba den pasado manera e accidente di Los Alfaques disaster, Gasexplosie Gellingen, 2013 Ecatepec de Morelos gas tanker explosion, of mas recien e Cap-Haïtien fuel tanker explosion. “Pero na Europa tambe e mercado di LNG ta un mercado recien y unda e autoridadnan tambe ta preocupa cu e risiconan cu ta envolvi den uso di e combustibel aki.”

No cuminsa cu LNG te ora cu tin tur capacidad y competencia

Conociendo e situacion na Aruba, e falta di capacidad y competencia necesario, e conseho di Leopoldo Henriquez na e autoridadnan di Aruba ta pa “no cuminsa cu e uso di LNG te ora cu e profesionalnan ta entrena pa por maneha e risiconan di e uso ey. Tambe ta bon pa exigi di e companianan estatal pa traha un rapport cu evaluacion di tur risico envolvi cu tur actividadnan critico unda lo usa LNG. E investigacion aki cu yama na Europa ‘risico inventarisatie en evaluatie (RIE).’

Habitantenan mester keda informa

Tur autoridad na Europa ta exigi e RIE, cu mester keda evalua cada pasa tres aña of cada biaha cu tin modificacion di e instalacionnan y pipanan di gas. “Mester determina tambe e asina yama ‘risicocontouren (risicocontourenkaart)’ pa asina tene cuenta cu e barionan di vivienda unda ruta di unda e pipanan ta pasa y informa e habitantenan envolvi di e risiconan di esakinan.”

Manera ta conoci, Sean Lalani di Eagle LNG a bisa cu ta bay usa e infrastructura actual pa e pipanan nobo di gas. Pero tur ta pasa den barionan habita, for di Marinierskazerne Savaneta via Savaneta, Pos Chikito pa yega na WEB. “E evaluacion di e risiconan mester ta basa ariba e norma di ISO, esta ISO 31000 . Tambe e companianan aki mester traha segun ISO 9001 pa calidad, ISO 45001 pa maneha seguridad y salubridad riba pia di trabao y ISO 14001 pa proteccion di medio ambiente.” Henriquez a agrega cu preferiblemente nan mester ta certifica pa cu e normanan aki menciona.

Ariba e website di PHMSA tin data di incidentenan cu a pasa di aña 2012 te cu awor. Esaki ta mustra cu un total di 28 incidente a pasa den total, loke ta un averahe di 3 pa aña.

Den un siguiente edicion, Sr. Leopoldo Henriquez lo amplia riba e peligernan di uso di LNG.