Dump di Parkietenbos mester ta e prioridad number 0 te 10 na e momentonan aki

Dump di Parkietenbos no ta e prioridad number un di Aruba awor aki. E ta e prioridad 0 te cu 10. Esey ta opinion di Ir. Leo Henriquez, ingeniero kimico cu hopi experiencia riba tereno di energia y maneho di desperdicio.

Pero pa soluciona e problema di dump, no por hacie cu un bunita video cu aspiracion, sino unicamente cu pasonan concreto cu por keda midi, y cu comunidad por compronde, Henriquez a bisa Bon Dia Aruba.

Henriquez tabata presente na momento cu Secretario di Estado, Alexandra van Huffelen a haci un bishita dilanti di e dump pa combersa y tende di e preocupacionnan di activista mr. Anouk Balentina. E momento ey, e ingeniero a adverti Sra. Van Huffelen pa no drenta dump y no cana riba e sero, pasobra ta yen di material peligroso tin combina cu otro. Ademas, e dump ta yena puntonan dera cu ta na candela continuo. Es mas, ora cu e Secretario di Estado tabata presente, huma a cuminza sali di un area dilanti di e sero, direccion di e caminda. Y asina tin mas rond di e henter e sero.

Pero ta esaki ta e preocupacion di Henriquez. Esta cu awor ta papia di un bunita plan di economia circular, unda ta saca video pa promove cu desperdicio por ta parti di un economia cu ta produci placa. Pero sin un plan concreto con, ta imposibel pa pone consumidornan compronde realmente kico nan rol ta den henter e problema di desperdicio.

Segun Henriquez, e concepto di ‘Circular Economy’, Economia Circular ta uno asina amplio. E mes a haya un total di 128 definicion di un economia circular cu ta nifica cu e no ta algo mucho concreto. Por ehempel, algun ta usa e concepto di Economia Circular segun e modelo di recicla, reduci, re-usa. Otro concepto ta cu ta diseña e productonan den forma cu unabes nan no tin uso mas, ta desmantela nan y ta crea otro producto di nan. Pues, pa Leo Henriquez, ora cu Minister Arends ta papia di Economia Circular, e ta zona mas bien manera cu kier bay den direccion di recicla y re-usa. Pero e pregunta ta con esey lo baha e cantidad di desperdicio na Aruba.

Peligroso pa cana riba dump

Nunca a controla kico tur a y ta tira riba dump. Consecuentemente, dump ta un peliger enorme pa salud, tanto pa e trahadonan, usuario y esnan cu ta biba cerca. No tin dato concreto cuanto di e trahadonan riba dump lo por a haya cancer. No ta informacion cu Aruba ta colecta, ir. Henriquez a ilustra. “Ami a traha 30 aña cu substancia peligroso, pues mi sa kico ta e riesgonan.”

Den concepto di Henriquez, e problema na Aruba cu nunca ta controla kico ta kima. Hasta e sludge cu ta bay den e incinerator, no tin bista exactamente kico tur tin den dje y kico ta kima.

“Tempo cu cu mi tabata traha como inspector den e industria di petroleo y gas na Europa, nos tabata separa tur material prome cu deshaci di nan. E compania mester declara kico ta e composicion di e desperdicio y esun cu ta transporta e desperdicio mester tin permiso special y esun cu ta acept’e tambe mester sa kico tin den e desperdicio. Ta depende di e calidad y kico ta den e desperdicio ta bay trata esaki, segun regla.”

Pero na Aruba, ningun hende ta controla kico ta drenta e dump di Parkietenbos. Para dilanti e dump, por a mira diferente pickup cu resto di mata corta. Pero tambe tin otro vehiculo ta drenta cu otro tipo di sushi y ningun hende ta controla e material. “Tin bateria yen di material pisa, tin azeta di motor y asina di cushina cu tambe ta produci substancia peligroso, pa no papia di asbest. Y con ta maneha cu desperdicio di hospital y e material radioactivo (iodium radioactivo) di hospital mes, a yega di puntra kico ta haci cu nan?” [red. segun literatura, hospital mester tin ekiponan special pa warda e desperdicio radioactivo aki cu ta di grado abao, cu ta perde su peliger despues di un par di dia. Sinembargo, mester deshaci di forma separa.]

Henriquez ta bisa cu na momento cu ta kima tur e materialnan aki, ta crea emision peligroso. “Ta den aire e ta bay toch? Ami no ta un experto den desperdicio. Pero mi a traha riba e control si pa mira si tur e companianan, incluso esnan di desperdicio ta cumpli cu normanan.”

Colecta gas methano

E candelanan cu ta cuminza riba dump ta cuminza spontaneo. Manera Henriquez y otronan a splica, e forma con ta tira tur material hunto, ta nifica cu ta keda partinan hopi cayente bao di e sero, cu ta keda ‘gloei.’ E motibo pakico ta keda actividad ta presencia di gas methano hunto cu asufro cu keda produci na momento cu kima, incluso feces. Den otro palabra e sludge cu e incinerador ta kima ta produci asufro y ta keda riba dump.

Sinembargo, tin forma pa haci uso di e methano combina cu e asufro aki. Na Merca y Europa unda ainda tin e tipo di dump habri (aunke mas controla cu esun na Aruba) ta coba pos cada tanto meter y ta saca e gas, y ta haci uso di dje pa combustible.

Pa tal motibo mes Henriquez no ta compronde kico a bay fout cu henter e proyecto di Ecogas y di con WEB no a acepta e gas. Manera ta conoci, un di e argumentonan tabata cu e gas cu Ecogas a produci no tabata na un nivel aceptabel pa e mashinnan na e planta di produccion di awa y coriente. Ir. Henriquez ta haya e ponencia aki straño, pasobra e material supuestamente peligroso den gas, ta den un presencia di asufro mucho mas concentra den e Heavy Fuel Oil cu ta kima tur dia. E cantidad di asufro den e gas methano cu por a saca di dump tabata mucho mas abao. Henriquez a bisa cu e no ta compronde pakico Aruba no haci uso di e experticio y conocemento cu Ecogas a acumula, ya cu e compania ta sigui e tecnologia cu ta proba den paisnan desaroya. “E solucion pa dump ta na Aruba caba,” ir. Henriquez a bisa.

Pero e plan bunita di Minister Arends, di anuncia cu economia circular ta e solucion, ta un bunita soño. Pasobra concretamente, formanan pa reduci e cantidad di sushi cu ta produci na Aruba ta pa yega na palabracion concreto cu productornan for di ken Aruba ta busca producto. Ora di produci algo of ta usa algo, e ta produci desperdicio. Aunke Minister Ursell Arends en principio tin rason cu mester bin cu economia circular pa yuda reduci e sushedad cu tur ta produci, pero mester cuminza drenta e aspecto basico prome, cu ta cera dump y si ta necesario, exporta e sushedad pa exterior unda por maneh’e miho. E tin su costo, pero keda cu dump habri di e forma con ta maneh’e awor, ta un cancer pa tur hende, Leo Henriquez ta opina.