Ir. Edwin Jacobs: Capacidad di paga ta determina e tipo di producto di cuido

Lo mester bin un cambio den cultura pa asina por sigui cu siguridad di cuido

E consehonan pa e proximo formado ta skirbi y pa Director di SVB, ir. Edwin Jacobs, encarga cu AZV, su mensahe ta cla. Reforma e fondo colectivo di seguro di cuido, y di fondonan di pensioen pa percura cu e fondonan colectivo ta keda sostenibel.

Den su combersacion cu Bon Dia Aruba, ir. Jacobs a bisa cu e atencion special mester ta riba AZV, pasobra e presion di gasto ta hopi halto y no ta sostenibel .

“Den hopi pais unda tin sistema colectivo di cuido ta rekeri un contribucion di ciudadano. Algun ta rekeri contribucion propio, of depende e pakete, tin un asina yama risico propio, esta cu e asegurado ta paga pa e prome 500 euro di gasto medico,” Jacobs a mustra. “Ta instrumentonan financiero, pa pone e asegurado pensa dos biaha si su caso ta urgente. Pero e ta bay man den man cu educacion, cu ta pone hende compronde miho kico ta sosodiendo cu salud di cada un. Aki tecnologia lo por yuda, pa sostene salud. Tin estudio y tin instrumento diseña pa esaki, pero mester wak kico tur ta e posibilidad tecnologico cu tin pa percura cu ta keda brinda acceso na cuido medico.”

Y esey ta locual e rapport di PriceWaterHouseCoopers riba AZV ta sugeri tambe. Por cierto, tanto College Aruba Financieel Toezicht, CAFT, como Hulanda tin e rapport aki.

Cambio di cultura

E reformanan como tal ta bay rekeri cambio y tur cambio ta encera cambio di cultura. “Tin forma pa motiva hende pa cambio y un ta e aspecto financiero.”

Y e pregunta crucial ta con e politico, e mandatario por bende e idea aki. “E ta algo duro, no ta facil. Na nivel di salud, Gobernantenan tin problema pa anda cu decision cu ta afecta cuido, pasobra tin di haber cu bida. Un pensioen ta importante, pero e ta bida di un hende. Salud ta bida. Y nos ta balora bida, y kier keda na bida. Nos kier esey. Pero, e tin su costo, pasobra ta capacidad di paga ta determina kico y cua calidad di producto por cumpra.”

Solidaridad

CAFT a bisa den su analisis cu e problema di salud cronico na Aruba ta rekeri cu e pacientnan mester asumi nan propio responsabilidad. Particularmente personanan cu diabetes ta tuma mas di e seguro medico, segun analisis. Como tal CAFT a bisa cu e grupo di pacient aki mester carga un poco mas di su propio gasto, por ehempel e verbandnan pa herida. Realidad ta sinembargo cu hopi persona cu problema cardiovascular ta den e categoria cu no ta gana salario halto na Aruba.

“Nos sistema di siguridad social ta basa riba un pilar hopi importante, cu ta solidaridad.

Conhunto mester asumi e riesgonan. Lo mester diseña un sistema cu e barera financiero no ta mucho abao, pero tampoco mucho halto. E reto ta pa yega na un nivel cu e ta realisabel. Y semper Gobierno tin otro instrumento pa yuda. Na Hulanda, Gobierno ta rekeri e contribucion propio, pero tambe ta duna zorgtoeslag cu ta yuda gruponan den cierto categoria di entrada, cu ta duna un apoyo. Pero mester mira kico ta realisabel den contexto di Aruba.”

Pues tin instrumento pa usa pa mantene e sobreconsumo bao control sin cu ta evita pa esun cu mester di cuido ricibi esaki. Ir. Jacobs ta kere cu un ‘sugar tax’ lo por contribui, pero e proceso pa yega na un instrumento asina aki lo rekeri energia y ta complica, pasobra tin mas partner den pais cu ta envolvi den e debate aki.

Haci uso di e crisis

E periodo pa haci e cambionan ta awor. Y ciudadanonan no por kere cu awor cu e pio parti di e pandemia ta tras di lomba, cu situacion lo ta manera 2019. Locual mester realisa cu hasta na 2019, e situacion tabata pinta hopi serio y mester a tuma paso. Prome cu COVID-19, ya Aruba tabatin reto. E pandemia a trece reto adicional.

E pandemia a empeora e cuadro financiero, no solamente di Gobierno, pero di fondo di AZV y tambe di famianan. “Tin menos entrada, pero e gastonan a keda mescos.” Y ta cu e realidad aki den mente mester enfrenta e periodo nos dilanti. “Despues di guera y crisis grandi manera e pandemia, paisnan, y Aruba mester bay den recuperacion. Pero recuperacion ta nifica sacrificio. E ta encera tambe cu mester haci cos diferente, na un sistema mas sabi. Pasobra si no, e pandemia no a yuda cu nada, y solamente a kita aña di bida di cada persona, haci hende infeliz pa mas cu un aña, pa kere cu por sigui haci tur cos manera tabata prome cu Maart 2020. Si no percura cu e recuperacion ta solido, lo no ta prepara (atrobe) pa e siguiente pandemia of otro crisis cu ta bin. Mester keda positivo y wak cu ta recuperando. Pero tin reto.”

Gasto colectivo halto no ta atractivo pa inversionista

E ta mescos cu si un hipoteca ta bay di 30 pa 40 porciento di entrada, pero e entrada mes ta keda mescos. Mas Gobierno kita di e Producto Interno Bruto, GPD, pa paga su mesun gastonan y esnan di siguridad social, menos ta keda pa maneha e pais.

“Mester maneha presion di gasto colectivo. Pasobra si e gasto sigui subi, Aruba no ta atractivo pa inversionista kende lo no mira e balor pa hinca su placa den un pais unda gran parti ta bay pa paga gastonan colectivo.” Ir. Edwin Jacobs a bisa di no ta pretende di ta un experto financiero pero e ta mira si cu mester determina e cuadro di gasto cu Aruba por carga y con e sectornan ta opera den e cuadro di e gasto ey. Unabes tin un cuadro di gasto, tur actor lo tin claridad kico mester sosode, cu ta inclui mas transparencia den tarifa.

Organo Ehecutivo AZV

Pregunta ta si e organo di AZV mes por reduci su gastonan di operacion. Jacobs a bisa cu na e momentonan aki, e organo ta opera eficiente pero no ta exclui cu den futuro lo por baha gasto di operacion mas ainda pa medio di mas digitalisacion. “E trabao di futuro ta pasa di administrativo pa mas control. E dunado di cuido mester ta encarga cu e parti administrativo pero AZV mester controla e gastonan. E organisacion riba su mes ta bon y ta responde. Tin algun espacio pa mehoracion, y si mi pensa na voz halto, mi lo bisa cu AZV falta un persona cu experticio actuarial manera ta e caso na SVB, cu constantemente ta ocupa cu proyeccion di pensioen di biehes. Esey no ta e caso na AZV. Pa mi, esey locual falta.”

Tin actividad den e dos organisacion cu por haci hunto, manera recurso humano, uso di tecnologia informativo (IT), finanzas y hasta servicio na publico. Tin espacio pa traha hunto. Kizas tin tarea cu SVB por inclui na AZV, por ehempel e BOAS, cu ta e Bijzondere Opsporings Ambtenaar, cu por yuda controla. “Si tin espacio. Cada uno ta seguro diferente, pero seguro di malesa tambe ta diferente cu pensioen di biehes y toch nan ta cay bao un capa. Pues en principio, por tin espacio. Pero e ta keda un decision politico,” Edwin Jacobs a expresa.

Den edicion di mañan lo tin e ultimo parti di e combersacion amplio cu Bon Dia Aruba a tene cu Ir. Edwin Jacobs, riba e rol di SVB mes den e pago di loonsubsidie y su tendencia, e fondo di pensioen di biehes y tambe e fondo di AWW (fondo di viudez y di huerfano).