Desde diamars, representantenan di Aruba ta participando den e encuentro interparlamentario IPKO na Hulanda. Un di e topiconan cu mas a hala atencion durante esaki tabata e discurso di presidente di parlamento Edgard Vrolijk, kende a sugeri cu Hulanda ta castiga Aruba.
E delegacion parlamentario di Aruba a probecha e apertura di IPKO pa insisti cu Hulanda mester cambia e prestamonan di sosten di likides, otorga durante temporada di Covid, den un regalo. Ademas, Vrolijk a exigi pa Hulanda refinancia e debe anterior di gobierno di Aruba cu un interes mas abao.
Algo cu a hala hopi atencion tabata e critica di Vrolijk contra e Colegio di Supervision Financiero (CAft) y Conseho di Minister di Reino, pasobra segun su opinion, nan ta “castiga” Aruba door di exigi disciplina presupuestario for di gabinete Wever-Croes. Conseho di Minister di Reino diabierna awo mester tuma e decision si ta sigui conseho di CAft pa duna Aruba un aanwijzing – un instruccion obligatorio riba presupuesto.
A pospone presentacion di alternativa pa geschillenregeling
Na final di e prome dia di IPKO, na ultimo momento e delegacionnan di Corsou, Aruba y Sint Maarten a nenga di presenta nan alternativa pa e rijkswet geschillenregeling. A keda anuncia cu nan ta bay hacie durante e segundo dia di IPKO na Den Haag.
Pa sorpresa di tur hende, presidente di IPKO a anuncia cu a elimina e punto di agenda, sin splica con ni pakico. Aparentemente, segun fuentenan di corant Curasoleño CuraçaoChronicle, e delegacionnan Caribense ta menos uni di loke nan a pensa durante e consultanan tripartite preliminar riba dialuna.
Segun e presidente, ta bay pospone e propuesta te na e siguiente IPKO.
