IPA ta introduci programa Perspectiva Mundial pa studiantenan

Instituto Pedagogico Arubano (IPA) a cuminsa cu e programa Perspectiva Mundial. Nan tema pa e aña aki ta Famia, paternidad y educacion ta fundeshi pa un comunidad duradero. Esaki segun e relato cu nos a haya di e instituto.

E programa ta encera con pa analisa e problemanan social den comunidad Arubano mas profundamente y a cuminsa dia 13 februari y ta dura te cu dia 28 februari. “Pa motibo di desaroyo no holistico, nos enfoke anterior tawata mas den direccion di un of dos perspectiva”, segun IPA. Sinembargo, Nacionnan Uni kier haci un cambio na 2030 pa loke ta trata trahamento den forma holistico dirigi riba e perspectivanan economico, social, medio ambiente y e asina yama ‘good governance’, e relato ta sigui bisa.

Basa riba e cambionan aki IPA tambe a evalua su agenda sostenibel y ta mira cu e aspecto social y governance mester ta mas profundo hinca den nos curriculum.

“Nos como IPA sa cu resultado di nos scolnan basico, specialmente e prome klasnan na Aruba no ta suficiente. Como IPA nos ta consciente di e problematica aki y nos sa tambe cu un bon resultado no ta depende solamente di nos maestronan, pero ta mara na famia. Nos famianan, mescos cu hopi luga na mundo, a cambia y lo sigui cambia, nos manera di ser mayor tambe a cambia. Tur esaki tin relacion directo cu e resultado di nos studiantenan di IPA y nos muchanan. Pues nos maestronan tambe mester implementa e concepto nobo aki pa por compronde mundo bon y purba di ta creativo pa soluciona problema di nos muchanan hunto cu e mayornan.”

Basa riba e cambio di pensamento aki, IPA a introduci caba na nos maestronan e asina yama habilidadnan di siglo 21. Esaki ta encera pensa solucion pa problema, sea creativo, afinidad pa digitalisacion, siña pensa critico y traha hunto.

“Hunto cu diferente partner nos ta spera cu nos studiantenan di e tercer aña lo por profundisa den e dos simannan aki mas den e tema aki ya cu esaki ta hopi esencial pa nos futuro maestronan.

Despues di e profundisacion aki, nos studiantenan ta bay pasantia den exterior for di dia 28 di februari pa dia 30 di maart. Nan lo studia e tema aki na Argentina, Costa Rica, Hulanda / Belgica, Barcelona, New York y Baltimore. Despues cu nan regresa Aruba, nan lo practica loke nan a siña di e tema aki den nos scolnan basico”, asina IPA ta splica.