IPA Marisol Croes: ‘Pa bira docente mester ta di curason’

IPA (Instituto Pedagogico Arubano) a comparti desaroyo pa 2020. Curso cu ta duna na maestro desde kleuter onderwijs te cu beroepsonderwijs. Mescos cu aña pasa, nan a bin cu programa cu yama ‘21^st Century teaching’ pa maestronan den e veld.

Marisol Croes, director di profesionalisacion IPA, a splica cu e parti di curso ta pa henter e grupo di maestronan di Aruba. Tambe tabatin un grupo mixto di maestro di scol basico, avansa y profesional, cu ta siña e tendencia mas nobo den enseñanza.

Nan a mara e habilidad cu ta necesario pa biba y siña funciona den siglo 21. Nan ta enfoca riba creatividad, colaboracion y habilidad pa pensamento critico. Esey ta nifica cu un siman nan lo duna les digital, e otro live y nan mes a haci tarea den klas, pa cuminsa duna les den un manera cu ta siña e muchanan e habilidad cu nan mester pa por funciona awendia.

Croes ta bisa cu di e forma ey no ta solamente buki, pero cu otro metodo manera digital na un manera sano y sabi. E ta bisa cu asina nan por traha hunto ‘ta premira cu mas hende den futuro no lo sinta den oficina haci trabou, sino ta bay mas den proyecto, uzo di habilidad creativo. Manera tempo di antes cu muchanan mester a keda keto den klas, pa bisa locual cu juffrouw ta bisa, pero awendia ta mas cu esey ‘e mucha ta bin cu idea y creatividad’.

“Hendenan mas rico di mundo ta esunnan cu a bin cu algo inventa. Nos no por keda siña muchanan locual tin den buki. Den nos mesun educacion nos a sufri di esey. Nos a coy net e habitonan bieu, esey no ta bay yuda nos muchanan awendia. Finalmente cu pensamento critico tin asina hopi informacion na mundo”, el a bisa.

Croes ta comparti si cu informacion cu trece mester ta di bon calidad. Tambe pa nan por wak e desaroyo nobo cu tin y hinca den klas un manera cu e mucha tambe ta desaroya diferente. Ta keda na e docente pa prepara e material cu e ta bay traha cune dilanti di e klas, sea internet of buki.

Sinembargo mester tene na cuenta cu e responsabilidad ta di e scol bestuur y scol mes ta scoge nan material. Tin scol cu tambe ta dicidi awendia cu nan mes kier nan docente traha cu material y nan buki.

“E parti di tarea di maestro ta pa nan tambe bin cu material nobo, nos ta actualisa na Aruba tambe y no uza buki di aña 70 mas, pues danki Dios. Pero nos tin nos sistema general den enseñanza cu no a cambia”, Croes ta expresa.

Locual nan sa cu maestro den klas, ta su momento crucial. Nan ta duna e hermentnan necesario, pero ta keda na e maestro. Croes ta bisa si cu mester ley nobo p’asina trece mehoracion den e curiculo, ‘tin cosnan chikito pa implementa ganashi grandi’.

Tambe a bisa cu si un mucha bin cu su conocemento for di cas of un mucha sa hopi den un materia of area, por duna e mucha oportunidad pa comparti cu e klas. Di e forma ey, e mucha ta keda stimula tambe. Ta trahando riba esaki pa asina por optimalisa pa mucha haya e miho enseñanza.

Pa ta un docente tin su reto, sinembargo e ta bisa cu tin docente cu ta scoge e profesion pa meneer of juffrouw pa motibo cu a inspira pa un maestro. Pero e ta mas cu esey, den e profesion mester keda desaroya y keda cambia, maske ‘cambio no ta facil pa ningun ser humano’.

E studio na IPA ta dura 4 aña, pa motibo cu ta un trabou pa cual mester ta capacita. Mester traha den e profesion pasobra cada cos nobo den mundo mester ta hinca den enseñanza. E ta splica cu tabatin tempo prome cu automatisacion, digitalisacion y robotacion, cu informacion no tabata cambia asina lihe.

Tin un falta di docente na Aruba. Manera director di SKOA a informa, ta den tur klas pero den kleuter mas ainda. A puntra Croes si tin un plan pa atrae mas hoben cu ta caba EPI, HAVO pa drenta den e opleiding.

Croes a splica cu esey no ta problema na Aruba so, pero henter mundo tin problema di falta di docente. E por ta pa motibo cu e funcion di maestro no ta atractivo pa nan, hende por hay’e dificil, ta confronta cu muchanan cu tin problema social, e trabou por ta pisa. Y ora scol caba ‘no ta cera porta y ta lag’e na trabou, pero ta hib’e cas’.

Locual e mes ta haya personalmente, ta cu hopi biaha nan no ta compronde cu e tarea di maestro ta pa keda ‘desaroya bo mes semper’. Pero e ta bisa cu nan porta ta habri pa alumno di EPI/ HAVO/ VWO.

“Pa docente tin cu keda siña pa bida. No ta buscando e mesun hende cu antes. Pero si ta un hende cu gusta siña y update, e carera di maestro por ta interesante”, Croes ta expresa.

Sinembargo e ta un funcion cu ta haci di curason. Si tin persona cu tin calidad di maestro, cu gusta siña y ta bon cu mucha, nan por conecta cu tur tipo di hende y por comparti su tempo cu ta flexible esey ta persona cu ta pas pa e trabou.

Pero si e persona tin e cualidad, pero no ta gusta e trabou, e ora no. “E mester ta un escogencia personal’ pa keda den dje y sigui studia den e sector cu ta birando moderno, desaroyo y innovacion cu ta den enseñanza.