Ayera mainta, Marisol Croes kende ta directora di recapacitacion di Instituto Pedagogico Arubano (IPA) a wordo invita door di minister di Enseñansa, Ciencia y Desaroyo Sostenibel, Rudy Lampe, pa anuncia un curso tocante formacion di maestro riba enseñansa digital. E ta cuminsa for di 24 di augustus te cu 1 di september awor.

Nan a tuma e periodo entre maart te cu augustus -cu el a yam’e como temporada piloto- pa siña kico ta e necesidadnan concreto di e maestronan na scolnan riba tereno di duna les digital. A base esaki, nan a prepara tur informacion cu ta wordo poni den un website habri. Durante e periodo indica ariba, tur dia for di 1’or di merdia, nan lo pone material nobo pa e maestro por educa su mes riba, con pa duna les online. E ta bira parti di nan pakete nobo como maestro, el a bisa.

E ta cubri tema manera, dicon y con pa duna enseñansa online. Con pa bo alumnonan saca lo maximo riba bo metodo online. Con pa diseña bo propio les online haciendo uzo di material cu ta existi caba, etc…

El a bisa cu formacion di maestro semper ta mara na loke e sociedad na e momento ey ta haya importante. Den nos caso niun hende por a premira e cambio grandi y drastico cu na luna di maart, e presencia di Covid a trece cune na Aruba. Di un dia pa otro scol a cera y mester a bay over pa duna les na distancia.

E cambio aki ta encera cu mayoria di biaha un maestro ta wordo forma pa duna les dilanti klas. Pero Covid a yega, y di golpi nan mester cuminsa prepara pakete pa manda cas. Pero educa su mes con e por duna les via metodo online. “Mi por bisa cu hopi maestro a siña masha hopi mes den e temporada aki,” el a declara.

Sinembargo e ta kere cu ta necesario pa duna e parti di profesionalisacion riba aspecto tereno di enseñansa digital na un manera structura y flexibel. Croes a declara cu e tin confiansa riba e “profesionalismo di tur nos maestronan na Aruba” E mes a pasa den e cambio aki di duna les online na Hulanda, e ta algo cu no ta pasa di un dia pa otro. P’esey nan a opta pa bin cu un website cu lo keda habri.

El a laga sa cu nos maestronan sa e necesidad di nan alumnonan. Nan a yega di mustra nan mes habri pa siña esaki ariba nan mes den e prome ceramento di scol na maart. P’esey e tin confiansa den e team di scol cu nan mes lo wanta nan mes responsabel pa sigui e cursonan cu ta necesario pa por duna les na nan alumnonan.

Certificacion

Naturalmente nan no por controla tur hende pa sigui e curso aki, pero si e ta haya cu como IPA nan lo yega na e decision di certifica maestronan riba enseñansa digital.

IPA tin e curso aki den preparacion. E ta bay cuminsa den e siguiente mita di e aña escolar aki kiermen for di februari proximo. Pa medio di e curso aki, riba preparacion di e maestronan den aspecto digital, nan lo por certifica nan pa medio di e curso aki.

Sinembargo e curso riba enseñansa digital di nos maestronan cu ta cuminsa entrante otro siman, e ta considera como un regalo pa nos cuerpo di docente pa duna e maestro e sosten necesario na e momento aki. E ta haya cu cada maestro tin su mesun talento, y tin otronan cu por ta, nan ta haya dificil con pa duna les online. Pero den e caso aki como IPA nan ta contando riba nan motivacion y riba nan conocemento di nan mes pa sigui educa nan mes. Croes a agrega cu e tin confiansa tambe cu cada directiva di scol tin nan plan pa nan maestronan sigui educa nan mes.