Siman pasa Instituto Pedagogico Arubano (IPA) a invita su partners den enseñansa pa e presentacion di nan logo y imagen nobo. E instituto pa formacion di maestro di Aruba a celebra recientemente 25 aña di existencia y a dicidi cu ta ora pa desaroya un imagen nobo pa futuro.
E ta un momento importante pa e instituto mirando cu IPA recientemente ta conta cu un directora nobo den persona di drs. Marilyn Richardson kende a wordo nombra pa lidera e organisacion aki den un era nobo.
Durante di e encuentro IPA a duna un presentacion tambe riba e diferente desaroyonan cu tin pa loke ta e programa di estudio. E instituto a duna un bista amplio di e diferente cambionan cu lo wordo introduci proximamente riba nivel di e curiculo. E renobacion di e curiculo ta bay na vigor pa e siguiente aña academico, esta 2017/2018.
Minister di Enseñansa, Michelle Hooyboer-Winklaar tabata presente na e encuentro y a splica cu e curiculo nobo ta uno mas varia, cu ta refleha e necesidad di nos situacion local y teniendo cuenta cu nos mundo global y moderno. E curiculo nobo tin un enfoke mas grandi riba e aspecto di formacion practico, cual ta hopi importante pa e preparacion di docentenan. IPA a splica e terminologia cu ta wordo uza y e programa completo pa asina e partnernan ta na altura di tur e cambionan y ta compronde e aspectonan nobo cu lo wordo introduci.
Ta importante pa cada paso cu IPA tuma wordo comparti cu nan partnernan, di cual e “veld” ta sigur esun di mas importante, Minister Hooyboer-Winklaar a remarca. E “stakeholdernan” ta contribui na e exito di e instituto y di cada studiante, segun e mandatario y ta importante pa nan forma parti di e grupo di sosten pa e cambionan den e curiculo tambe.
E encuentro tabata uno hopi ameno y den e siguiente simannan lo sigui un periodo di transicion cu lo ta bay ta importante tambe segun e titular di enseñansa. Minister Hooyboer-Winklaar ta felicita IPA cu nan imagen nobo y cu tur e desaroyonan positivo di e instituto y ta entusiasma cu e posibilidad nan den e era nobo di IPA.
