ORANJESTAD – A pesar cu nos prome mandatario, Evelyn Wever-Croes ta sigura cu e relacion cu autoridadnan Mericano ta mehorando y danki na e contactonan y esfuersonan cu gobierno ta haciendo, nos por mira cu gobierno di Merca a duna un licencia general 7a pa loke ta trata refineria. Tambe cu nan lo por lanta parcialmente y temporalmente e sancionnan manera gobierno a pidi nan.
Pero e realidad ta mustra otro cos. Mas hende den e refineria ta wordo kita for di trabou, locual sindicato IOWUA ta vocifera nan preocupacion pa e situacion aki. E situacion aki ta mustra cada bes mas delicado te hasta pa stabilidad economico di nos pais.
E veterano sindicalista y presidente di Independent Oil Workers Union of Aruba (IOWUA), Boy Anthony, no ta compronde ainda con e prome mandatario ta bisa algo asina. Mientras trahadonan ta wordo kita for di refineria. Segun Anthony, si e sancion aki no ta wordo kita for di Citgo Aruba, bo ta sinta cu nan ta sigui corta. Si e cortamento di personal ta sigui asina, cierto momento nan ta bay yega na e terminal, y e panorama aki lo bira mas delicado pa nos pais.
Si nan ta cuminsa corta riba personal cu ta traha den terminal debi cu nan no tin placa pa paga e trahadonan, e ta bira un situacion delicado. Ya cu e terminal aki ta provee di combustibel e pomp stacionnan y tambe fuel pa aeropuerto abastece e avionnan. Pero tambe nan ta provee e combustibel pa e compania di utilidad di awa y coriente por opera pa henter nos isla debidamente.
E ta puntra su mes: kico ta bay pasa si no tin mas placa aki un luna y mey of dos luna door di e sancion? E sindicalista ta compronde cu e sancion no ta den nos man, pero ‘e ta afecta nos pisa.’
E no sa si tin un plan pa atende cu e terminal pa garantisa combustibel pa nos pais, ya cu esaki ta algo fundamental pa nos pais y mester keda den operacion. “Asina un desaster por bira si bo no tin e productonan ey!,” el a declara na Bon Dia Aruba. Aparentemente gobierno tin un plan pa atende cu e terminal den caso di cualkier eventualidad.
