Despues cu gobierno a anuncia cu nan ta den e proceso final cu e compania Mericano Valero pa loke ta e traspaso di e refineria, ainda ta pendiente e situacion di e trahadonan cu actualmente ta den servicio di Valero. Nan ta un grupo relativamente chikito di trahado, pero cu nan derechonan y prestacionnan cu sindicato IOWUA ta defende di acuerdo cu nan contracto colectivo (CAO).
Na e momento aki, oficina di Mediador di Gobierno ta coordinando un reunion cu gobierno a base di un peticion cu nan a ricibi fei IOWUA. Recientemente sr. Anselmo Pontilius den su rol di Mediador di Gobierno a reuni cu presidente di e sindicato IOWUA, sr. Boy Anthony, ya cu e sindicato aki ta representa e trahadonan cu ta traha directamente cu Valero.
Sr. Pontilius a declara na Bon Dia Aruba cu e ta considera cu IOWUA su aportacion ta hopi importante basa riba nan propio experencia di loke nan a pasa den pasado. E sindicato aki a wordo reactiva na momento cu Coastal a habri e refineria na añanan 90, y ainda ta existi keto bay.
Sr. Pontilius a indica cu minister di Labor y minister di Energia cu ta esun mas envolvi den e negociacion, lo participa di e reunion cu sindicato IOWUA a solicita. Nan ta pendiente di e fecha di e reunion aki cu gobierno caminda nan lo atende cu directiva di IOWUA directamente.
Condicion di trabou
Sr. Pontilius ta haya cu directiva di sindicato IOWUA no mester ta preocupa cu nan trahadonan. “E trahadonan ey tin garantia cu nan lo pasa over. Nan tin un CAO vigente, pues ami ta kere cu na nan no lo tin e dificultad ey y nan no ta hopi trahado tampoco”, sr. Pontilius a declara na Bon Dia Aruba.
Nan ta un grupo di menos cu 80 trahado, pero loke ta hopi importante cu sindicato IOWUA ta defende e condicion di e trabou contracto existente den e CAO y con esaki ta bay cambia den futuro cu Citgo, y asina garantisa cu loke nan tin ta wordo respeta y ta keda den e operacion nobo di e refineria.
Sr. Pontilius a indica cu esaki ta hunga un rol hopi importante semper cu bo ta haya bo cu un dunado di trabou nobo. Tin dos parti cu sigur e ta haya cu IOWUA lo pidi splicacion, considerando cu pais Aruba ta bira doño di e refineria, ya cu e propiedad ta bira di pais Aruba.
Ta bay tin un empresa estatal cu ta bay maneha e propiedad ey –manera na Corsou y otro parti di mundo- den forma di un NV, locual no ta nada straño. Pero IOWUA kier claridad riba con lo ta para cu nan trahadonan. Ya cu lo bay tin dos grupo di trahado. Un ta e grupo di trahado grandi na servicio di e contratistanan cu lo realisa e trabou di acomoda y renoba e refineria. Pero tambe lo bay tin un grupo di trahado cu lo bay traha pa e refineria directamente. Seguramente e sindicato lo ta interesa di sa pa ken ta bay bira nan dunado di trabou.
Na final, sr. Pontilius a laga sa cu e sindicato IOWUA tin confiansa cu no lo tin problema pa nan condicionnan di trabou, pero nan ta haya importante di por tende fei di e mesun mandatario (nan) cu tabata den e negociacion directamente y haya trankilidad riba e continuidad di nan trabou. Pero tambe di nan condicion di trabou y nan tambe kier premira con nan lo bay negocia nan proximo contracto colectivo (CAO) cu e dunado di trabou nobo.
