IOM a realisa tayer na ONG’s local tocante principionan di proteccion di datonan

(IOM) International Organization for Migration na Aruba a realisa un tayer dirigi na diferente ONG’s local cu ta traha cu gruponan vulnerabel pa asina nan por haya mas informacion di loke ta trata e principionan di proteccion di datonan.

Sandra Peña coordinador di IOM na Aruba a splica na Bon Dia Aruba cu pa IOM esaki ta importante pa motibo cu un di nan training obligatorio ta di proteccion di datonan debi cu nan ta traha cu gruponan hopi vulnerabel unda nan mester protege e datonan y evita pa nan por wordo exponi y pone e personanan den peliger.

Den e tayer aki, Peña a splica cu nan a haci un dobel training na La Casa del Venezolano pa celebra e dia di derechonan humano cu a tuma luga diasabra ultimo dia 9 di december, “cu esaki nos ta apela na e derecho pa privacidad di tur ser humano cu awendia ta hopi complica y cada biaha ta mas dificil pa haya”, Peña a expresa.

El a trece dilanti como ehemplo un aplicacion cu na e momentonan aki hopi hende riba rednan social ta usando, e aplicacion aki ta pidi pa manda potretnan di e usuario pa crea diferente avatar y “tur hende ta compartiendo esey y na final nos no sa con esey ta funciona of si e aplicacion tin algun tratamento di datonan, nos ta compartiendo boluntariamente informacion sensibel di nos”, el a comenta.

E meta di e training dirigi pa organisacionnan ta pa crea conscientisacion tocante e recaudacion di datonan di personanan unda nan mester sigura cu e informacion ey lo mester wordo trata di un manera sigur pa protege identidadnan di e personanan beneficia, cu esaki ta evita pa tin tratamento discriminatorio of pa nan no ta den peliger, por ehemplo, Peña a declara cu si den un pais hopi religioso ta recolecta datonan y despues ta haci uso di e informacion exponiendo esey na publico en general, e lo por causa problemanan pa cierto gruponan cu ta wordo rechasa, cu por wordo discrimina of por wordo ataca, etc.

“Nos mester ta hopi cauteloso den con nos ta maneha e informacion di e personanan”, el a bisa.

Cu e tayer aki nan ta purba di fortalece e capacidadnan di e ONG’s local pa asina nan por siña di temanan nobo y por aplica esey den nan maneho.

Den e principionan di colecta datonan tin diferente punto como recopilacion licito y husto, unda e datonan personal mester wordo obteni via medionan licito y husto cu conocemento of consentimento di e persona interesa.

Mester tin un proposito specifico y legitimo, cu ademas di ta di conocemento di e persona interesa na momento di e recopilacion, e datonan personal mester sirbi unicamente cu un fin specifico.

Calidad di e datonan mester ta adecua, oportuno y lo surpasa e proposito specifico di recopilacion y procesamento di datonan. Esunnan encarga di procesa e datonan mester tuma tur e medidanan rasonabel pa ta sigur cu e datonan personal ta exacto y actualisa.

Consentimento na momento di recopilacion di datonan mester ta rasonabel tumando de consideracion e condicion y capacidad huridico di algun gruponan y personanan vulnerabel.

Transferencia na un tercer persona, e datonan por wordo transferi na un tercer persona cu e autorisacion di e persona interesa, pa un fin specifico y cu e garantia cu lo salvaguardia y protege e confidencialidad pa respeta e derechonan di e persona interesa.

Confidencialidad mester wordo aplica den tur etapa di recopilacion y procesamento di datonan, mester garantisa esey por escrito.

E datonan mester ta sigur tanto for di e punto di bista tecnico como administrativo, mester wordo protegi cu medidanan rasonabel y apropia di cualkier modificacion no autorisa, manipulacion, destruccion, perdida accidental, divulgacion no autorisa of transferencia inadecua.

Supervision, cumplimento y solucionnan interno unda mester nombra un identidad independiente cu lo encarga di e implementacion di e principionan aki, e puntonan di proteccion di datonan mester colabora den e monitoreo y capacitacion corespondiente, tambe lo adopta medidanan pa resolve cualkier caso di recopilacion of procesamento ilicito, como tambe cualkier violacion di derechonan of interes di e personanan interesa.

IOM ta usa e principionan aki enfocando riba e datonan cu nan lo colecta mester ta husto y legal, unda nan ta pidi na e personanan datonan cu tin mester di dje den e marco di ley, sin consentimento di e personanan no por comparti ni usa e datonan.

Nan ta haci cierto evaluacion di riesgo y sensibilidad pa wak si ta bale la pena colecta cu e proposito specifico of no.

Na final di e tayer aki nan a duna un manual na ONG’s tocante proteccion di datonan pa na por wak con por aplica den e organisacionnan aki y tambe adapta e principionan.

Peña a splica cu nan como organisacion dedica pa yuda personanan refugiado of migrantenan den situacion vulnerabel por ehemplo gobiernonan of otro organisacion ta pidi na nan algun informacion, prome IOM ta solicita cierto rekisitonan cu mester cumpli pa por comparti e datonan, pero si nan ta mira cu ta peligroso nan no ta haciel’e.

Hopi hende a sali di nan pais of di nan ciudad pero no di un bon manera, manera Peña a pone como ehemplo habitantenan di algun departamentonan di Colombia cu mester bandona nan cas pa via di conflictonan arma “hopi hende ta den mesun situacion aki unda nan no kier wordo exponi, igualmente migrantenan y refugiado cu no kier wordo exponi pa nan situacion debi cu nan por ta den peliger of no tin documentonan legal y por wordo deporta, tambe tin otro gruponan vulnerabel cu mester di proteccion pero en terminonan general, corda semper cu nos tur tin derecho na privacidad, esey ta e parti principal” Peña sigura.

Pa finalisa, IOM ta kere cu ta hopi importante pa organisacionnan fortalece nan capacidad y caminda nan por acerca tambe na diferente instancia como La Casa del Venezolano unda IOM tin un lista di training cu nan ta duna pa cualkier persona cu ta interesa den esey.