(IFLScience)—Investigadornan a desaroya un tecnologia innovativo cu por converti algun celnan canceroso den un estado cu ta parce celnan normal sin mata nan. E metodo aki no ta representa solamente un manera nobo pa posiblemente trata cancer, pero tambe uno cu ta preveni efectonan produci pa otro tratamento y e riesgo di resistencia.
Inversion di cancer, cual ta retrocede celnan canceroso pa nan estado diferencia y no-maligno, a ser proponi como un posible metodo terapeutico nobo pa basta tempo caba. Celnan canceroso frecuentemente ta “indiferencia,” cual ta nifica cu nan ta perde e caracteristicanan specialisa di celnan normal.
Via un proceso di reinduci e expresion di gene asocia cu diferenciacion, cual ta tipicamente muta of “paga” den celnan canceroso, e por ta posible pa reactiva nan y restaura nan funcion normal of hasta logra “trans-diferenciacion,” unda celnan canceroso ta diferencia den diferente tipo di cel (por ehempel, celnan canceroso di pecho ta ser redirigi pa bira mas specialisa den celnan di higra).
Investigacionnan den pasado a demostra e retrocede di celnan canceroso asocia cu leukemia, cancer di pecho y carcinoma hepatocelular—un tipo di cancer di higra. Sinembargo, no tin un identificacion sistematico di loke ta ser yama “master reguladornan”—gene of proteinanan specifico cu ta controla e proceso di diferenciacion—cu ta induci e tipo aki di diferenciacion/trans-diferenciacion. Esaki ta un stap importante, como cu por medio di identifica e reguladornan aki, e ora cientificonan por manipula celnan canceroso y reprograma nan pa bira celnan normal, asina ofreciendo tratamentonan alternativo of complimentario.
Den nan ultimo estudio, e equipo di investigacion lidera pa profesor Kwang-Hyun Cho di e Department of Bio and Brain Engineering na e Korean Advanced Institute of Science and Technology (KAIST), a subraya un tecnologia cu por converti celnan di cancer di tripa den celnan efectivamente normal.
E equipo a enfoca riba e observacion cu durante e proceso oncogenetico—un proceso di varios stap unda celnan normal ta transforma den celnan canceroso—celnan normal ta retrocede hunto cu nan trayectorio di diferenciacion. Esaki ta permiti nan desaroya un tecnologia cu ta crea un gemelo digital di e red di gene asocia cu e trayectorio di diferenciacion di e cel normal. Via e simulacion aki, nan por a identifica sistematicamente e switchnan molecular principal cu ta induci diferenciacion normal.
Ora a aplica e switchnan aki na celnan canceroso di tripa, e celnan a inverti pa un estado parecido normal. E resultadonan aki a ser confirma despues pa experimentonan molecular y celular conduci riba suhetonan animalistico.
E trabao aki ta mustra cu inversion di celnan canceroso por ser logra por medio di crea y analisa gemelonan digital di e red di gene di e cel canceroso. E metodo aki ta crea un manera mas sistematico pa sigui dilanti, en bes di depende riba descubrimentonan accidental. E ta posible cu e descubrimento aki por resulta den terapianan nobo pa inverti cancer cu por ser usa riba varios tipo di celnan canceroso.
