(NLTimes) – Investigadornan na Delft a logra trece teleportacion for di ciencia ficcion na mundo real, por lo menos den e mundo Quantum.

Quantum ta e cantidad di energia proporcional na e magnitud di e frecuencia di e radiacion cu esaki ta representa. Investigadornan di QuTech ta e prome den mundo cu a logra yega na data di teleprotacion, cual ta un desaroyo importante den e investigacion riba ‘Quantum Internet’, Trouw a reporta. E investigacion a keda publica den e revista Nature e siman aki.

Segun e leynan clasico di fisica, nada significante por move na un velocidad mas halto cu luz. Cual ta nifica cu haci algo material of informacion disparce di un punto y reaparece na otro punto na e otro banda di mundo na mesun tempo por ta imposibel, pero esaki ta posibel segun e investigadornan na QuTech, un colaboracion entre TU Delft y TNO. Teleportacion ta posibel, solamente cu no den e mundo di fisica clasico, sino den e mundo di fisica quantum.

4 aña pasa, QuTech y otro cientificonan den mundo, a comproba cu teleportacion di informacion quantum ta posibel riba papel. Awo, e investigadornan di QuTech a logra haci esaki den practica. E magia ta pasa ora cu 2 particula elemental ta drenta den e mesun estado quantum.

Consecuentemente, nan ta permanente conecta eternamente, aunke cu nan caba na diferente puntonan. Si un ta cambia, e otro ta cambia na mesun tempo sin importa e distancia entre nan.

E fenomeno aki ta yama ‘entanglement’ y por ser usa pa transferi informacion quantum. QuTech a demonstra esaki cu un red unda cu tabatin 3 punto y 3 procesador quantum, cual e investigadornan a yama Alice, Bob y Charlie. Bob ta conecta cu ambos Alice y Charlie via fiberglass, sinembargo Alice y Charlie no tin conexion fisico cu otro, nan ta e comienso y fin di e red aki. Bob ta facilita teleportacion pa medio di combina su condicion cu Alice y haci mesun cos cu Charlie. Di e manera aki, Bob ta haci cu Alice y Charlie ta mescos cu Bob, cual ta causa cu e dos puntonan di e red tambe ta conecta.

Awo, si bo cambia un informacion na Charlie su estado quantum, e informacion aki ta cambia na Alice tambe na e mesun tempo. Lo que ta remarcabel di e estado quantum aki, ta cu nan ta existi te ora cu bo midi esaki. Na momento cu e informacion keda midi of usa, e ta disparce. Si Charlie su estado quantum keda midi ora e ta cambia y disparce, pero apareciendo na Alice na mesun momento, esaki ta bira teleportacion.

E vulnerabilidad di esaki ta loke ta haci e investigacion asina complica, na momento cu bo haci algo e informacion ta keda perdi. Bo no por copia nan tampoco. Sinembargo, e ta un bentaha tambe pa motibo cu den internet teoretico quantum, e privacidad di comunicacion ta garantisa. Si cualkier persona purba intercepta un mensahe, esaki e mensahe lo disparce. Solamente e persona cu a manda e mensahe y e persona cu lo ricibi esaki por mira y sa e informacion.

Den futuro, quantum internet lo ser forma cu computer quantum, cual ta den proceso di desaroyo. Computer quantum ta usa un otro tiki di magia di fisica quantum, e fenomeno cu particulanan por asumi varios forma quantum na mesun momento. Contrario na e informacion ‘bits’ actual, ‘qubits’ no mester ta ni 0 ni 1, sino cu e por ta ambos na mesun tempo. Como resultado, computernan quantum por calcula varios biaha mas lihe compara cu e computer mas lihe den existencia, entre varios otro cualidadnan.