(YahooNews)—Investigadonan por a descubri kico ta causa cabey blanco, cual ta duna speransa cu un tratamento pa preveni of inversa e proceso por ta alcansabel pronto. Publica diaranson den e revista Nature, e estudio ta mustra cierto stemcel, cual tin e habilidad pa move entre compartimento di crecemento den foliculo di cabey, ta keda pega mientras cu hende ta bira mas bieu y ta perde nan habilidad pa madura y mantene color di cabey.
E investigacion ta enfoca riba celnan den cuero di raton cu tambe por haya den humano, cual ta yama stemcelnan melanocyte. A traves di tempo, mientras cu cabey ta madura, cay y crece back, na dado momento e celnan aki no por sigui move manera antes, y pues ta faya di yega na e parti di e proceso unda ta genera pigment.
“Nos estudio ta añadi riba nos comprendemento basico di con stemcel melanocyte ta traha pa duna cabey color,” segun Qi Sun, un compañero postdoctoral na NYU Langone Health y ken ta lidera e estudio aki. “E mecanismo descubri ta aumenta e posibilidad cu e mesun posicionamento di e stemcel melanocyte por existi den humano. Si ta asina, esaki ta presenta un posibel caminda pa inversa of preveni cabey bira blanco pa medio di yuda celnan pega move atrobe entre compartimento di foliculo di cabey cu ta desaroyando.”
Investigado mayor di e estudio, Mayumi Ito, ta agrega: “e perdida di funcion manera camaleon den stemcel melanocyte por ta responsabel pa e perdida di color den cabey.”
Den un declaracion pa CBS News, Ito—profesor den e Departamento di Dermatologia na Ronald O. Perelman y den e Departamento di Biologia di Cel na NYU Langone Health—a splica cu e estudio ta sugeri cu stemcelnan melanocyte ta mobil, pero por cuminsa regeneracion di melanocyte—cual ta produci color den cabey—solamente ora esaki ta presente den un area specifico den e foliculo di cabey yama “hair germ compartment.”
“Nos estudio ta sugeri cu pa move melanocyte pa un localidad adecua den e foliculo di cabey por yuda preveni cabey bira blanco,” Ito a skirbi, agregando cu nan “ta spera pa investiga con leu nos teoria por ta aplicabel pa humano.”
