Recientemente, minister di Husticia y Asuntonan Social Sr. Rocco Tjon a reuni cu e investigadonan academico di IPA y Vrije Universiteit Amsterdam, kende ta e investigadonan cu ta bay ehecuta e investigacion “quality of life of the Aruban youth”.
Ministerio di Husticia y Asuntonan Social ta kere den “evidence based policy”, y a base di e informacion cu ta bay wordo colecta di e investigacion aki, lo bay traha un plan di maneho multianual pa cu esaki.
Tur e trabounan preliminar pa loke ta e investigacion y e cuestionario ta cla, y esakinan a wordo examina tambe, cual ta nifica cu aworaki nos ta den e fase di ehecucion. Si tur cos bay segun planificacion, e idea ta pa percura pa e recopilacion di data ta cla pa zomer 2023, y despues lo haci e analisisnan. E investigacion ta bay enfoca riba nos hobennan, pero tambe lo bay enfoca riba tur nos scolnan basico, mavo, scol avansa como tambe pa esnan di scol special.
Lo haci un encuesta enfoca riba e calidad di bida di alrededor di 4600/5000 studiante di 5e y 6e klas di scol basico. E investigacion lo enfoca riba topiconan manera e antecedente di e salud mental di e famia di e hobennan, e antecedente cultural, actividadnan social, e ambiente escolar, bullying, autoestima pero tambe riba aspectonan di e bario.
Y ora ta papia di barionan, ta link esaki mesora cu e proyecto di Veilige Barios, akinan lo wak con nan experencia ta den e bario, kico nan ta haya falta di dje, kico mas nan kier wak pa cu e desaroyo di e barionan etc. Banda di esaki tambe lo scoge dos pa tres scol di e ocho districtonan di Aruba y lo entrevista e directorado di e scol y lo haci ocho session den grupo cu mayornan di cada districto.
Por ultimo, e mandatario a indica cu ta trata di un investigacion hopi holistico y ta conta cu e colaboracion di Ministerio di Husticia y Asuntonan Social y Ministerio di Enseñansa y Deporte.
