Investigacionnan ainda no a saca e causa di mal holo producto supermercado

Te ainda niun investigacion cu a wordo haci a identifica e causa exacto di e mal holo cu cierto productonan bendi den cierto supermarketnan ta haya. Te hasta tin producto comestibel cu ta smaak desagradabel na cierto tipo di detergente of producto kimico.

Directora di seccion di Higiena y Inspeccion di Alimento di departamento di Salud Publico, Yvette Geerman ta declara na Bon Dia Aruba cu no tin un desaroyo nobo riba e investigacion cu nan ta haciendo pa basta tempo pa descubri e causa di e problema aki.

Tin cierto productonan pa ehempel kipashi cu ora ta wordo bendi den cierto supermercado, nan ta haya holo di detergente, y esaki ta un keho cu consumidor ta haciendo pa basta tempo caba.

Sra. Geerman ta declara cu e problema aki cu ta afecta nos consumido ta keda ‘un punto di preocupacion pa departamento di Salud Publico’, mirando cu nan no por haya e causa precies kico ta ocasiona esaki. “Si bo sa e causa e ora eynan bo por tin miho control riba cierto cosnan.”

Te ainda nan por haya un solucion satisfactorio pa e pueblo y ni pa nan encarga cu higiena y inspeccion di alimento.

Investigacion

Nan a haci cierto investigacion pero nan lo mester keda amplia e tipo di investigacion aki. Tin cierto momento cu nan no ta haya niun keho, y mientras kehonan no ta drenta, nan ta asumi cu tur cos ta bon. Pero unabes cu keho ta lanta, nan ta bay controla, y nan no ta haya nada, cual ta haci e situacion aki uno dificil.

Nan investigacion no a mustra un causa precies, ya cu tin hopi cos poni cu ta duna un posibel indicacion cu e parti kimico ta hungando un rol. Kimico referiendo na cierto detergente cu ta wordo uza y cu nan holo ta penetra cierto productonan. Te hasta nan a purba di wak si ta e tipo di plastic cu ta wordo uza y cu cierto companianan ta bin cu ne.

Sra. Geerman ta indica cu ora nan ta haci nan investigacion, nan ta averigua ki tipo di detergente ta wordo uza, pero cada un ta uza diferente detergente. Esaki ta hacie dificil pa bisa cu tin un tipo di detergente specifico cu ta ocasiona e holo ey.

Ta wordo papia di cierto insecticida uza ora cu e negoshi ta cera. Esaki nan ta puntonan cu a bin na atencion di e seccion di Higiena y Inspeccion di Alimento y cu nan no ta neglisha. “Tur esakinan nos ta poniendo atencion tambe riba nan.Pero manera ma bisa, mi no tin un contesta awor.”