Bon Dia Aruba ta hibando un investigacion riba e tema di menornan di edad cu ta wordo forsa pa labora. Den cuadro cu esaki, a tuma contacto cu diferente instancia y departamento pa haya mas informacion.

Tin mucha cu ta traha na supermercado, minimarket of yuda nan mayornan den negoshi pero esaki no por wordo haci den oranan di scol. E por wordo haci despues cu mucha cumpli cu obligacion di enseñanza.

A yega di haya caso nan asina, obvio e por ta cu e dia ey mucha no a bay scol cu excuus cu ta malo pero esey no ta duna derecho pa traha e oranan ey. Si mester haya un mucha trahando e prome stap pa sigui ta investiga e motibo dicon.

Bureau Leerplicht a yega di haci nan control y nan ta splica cu ‘den pasado a drenta melding cu den supermercado tabata tin menor di edad trahando den ora nan di scol. E control ta si porta cu e mucha e dia ey ta liber. Nos ta busca informacion na scol pa verifica cu ta berdad, mester haci cierto investigacion’.

“Nos tin cu sigui cierto procedura, tin cu studia e caso prome. Mester combersa cu mayornan pa motibo cu e mucha ta menor di edad. Yega na e cas di e mucha, wak con e situacion den cas ta”, nan ta sigui splica.

Pa medio di investigacion na e mayornan ta ripara ora na nan cas cu nan por constata cu tin pobreza of cualkier diferente situacion cu ta trece dificultad den famia. “Nos ta meld aan na e otro departamentonan. Si e mayor nan mes ta bisa cu tin necesidad riba e parti financiero pa nan biba, nan ta wordo manda pa Social Zaken. Si ta situacion nan mas pio e ora ta manda nan otro departamento manera Voogdijraad. Tur cos ta a base di locual nos constata ora nos haci bishita na cas.”

“Tur caso ta diferente, e manera di maneho tambe ta haci esaki diferente. Importante ta kico ta wordo constata asina nos ta tuma e siguiente stap pa cu e otro departamento. Si na comienso no tin te maken cu nos, nos ta zorg pa e caso wordo manda na e departamento cu ta encarga.”

Un ambtenaar di Bureau Leerplicht ta splica cu na comienso tabata tin cierto discusion si por a drenta den supermercado of cualkier otro luga pa haci control. Den su bista e ta haya cu nan tin derecho di controla esaki pa motibo cu ta ora di scol. “Nos prioridad ta e mucha, pa zorg cu e mucha mester ta na scol y no trahando”, e ta comenta.

“Den un futuro nos kier haci esaki, hunto cu DAO cu tambe ta biniendo cu ley nobo pa asina control wordo haci regularmente cu diferente departamento. No solamente warda pa hende meld aan. Mester planea adelanta pa asina tur cos cana manera mester ta.”

Bon Dia Aruba a acerca Ministerio Publico (OM) pa wak si a yega di tin caso na unda un mucha ta wordo forsa pa traha y kico a/ta wordo haci. “Nos no a yega di wak un caso asina. Tampoco nos no ta drenta den casonan asina te na final di e cadena”, vocero di OM Ann Angela a splica. OM ta tuma accion si ta mira cu ‘e caso ta den abuso of maltrato di e mucha’.

Den nos siguiente edicion, nos lo ta elaborando un poco mas riba e topico aki.