Ayera den un conferencia di prensa di prome minister Evelyn Wever-Croes, el a papia di e topico di Arubahuis unda a bin dilanti cu e investigacion te ainda ta andando. Sinembargo, Wever-Croes a admiti cu algun cos no a bay manera mester a bay na Arubahuis, p’esey el a pidi Centrale Accountantsdienst (CAD) pa haci un investigacion.

Wever-Crpes a considera importante splica cu oposicion ta bin treciendo den noticia un e-mail di aña 2021 unda ta menciona cosnan cu no ta bayendo bon den Arubahuis.

“Na prome luga mi tin cu bisa cu mi ta conoce e e-mail aki, mi a ricibi e e-mail aki y e denuncianan di e-mail aki ta exactamente loke mi a pidi pa e investigacion. Kiermen e ta parti di e investigacion cu mi mes a pidi den cuadro di Arubahuis. Mi por bisa cu hasta esun cu a manda e e-mail aki a resulta di ta parti di e investigacion tambe, ta parti di dje”, el a menciona.

Tambe prome minister a compromete su mes cu manera cu e investigacion y e consehonan rond di esaki cla, “mi lo presenta esaki na parlamento y informa henter comunidad di dje, esey ta mi compromiso y mi ta cumpli cune tambe”.

Igualmente, a declara cu locual cu ta pasando ta cu e investigacion ainda ta den proceso y cu cosnan asina “por tarda”.

“Mi ta haya lamentabel cu djis pa purba daña mi nomber, tin politiconan cu ta purba di daña un investigacion asina importante, pasobra ora cu politiconan oponente ta denuncia cos y exigi investigacion – manera ma bisa for di hopi siman pasa – bo ta daña e investigacion. Mi mester bisa cu mesun ansha y pura cu oposicion tin pa esaki keda cla, mi tambe tine, pasobra mi kier pone un punto final tras di e tema aki”, el a indica.

Ademas, el a recorda cu su persona ta esun cu a pidi pa cuminsa e investigacion aki y cu si un hende a haci cosnan robes “e tin cu carga cu su responsabilidad y tin cu sinta riba su blaar, no ta importa ken e persona ta”.

Prome minister a referi na parlamentario di Partido MAS, Marisol Lopez-Tromp cu “ta insisti hopi pa haya e rapport y mi a haya un carta di dje al respecto y cada carta mi a contesta di un forma netjes y respetuoso cu asina cu e investigacion ta cla, e ora ey nos ta inform’e. Mi ta kere cu Sra. Marisol Lopez-Tromp mas cu tur hende ta compronde cu e investigacionnan ta tarda, e mes ta e sospechoso den e caso Cucuisa cu ta tardando hopi mas cu un aña. Y e caso aki a causa hopi daño na Aruba, pasobra ta e ministernan di Infrastructura prome cu mi, cu a bay haci wega politico na departamento manera DIP y awe ta perhudicando miles di ciudadano cu no por haya un tereno pa traha nan cas pa motibo di caso manera Cucuisa”, el a declara.

Parlamentario Gerlien Croes di AVP tambe ta un cu a pidi pa haya resultadonan di e investigacion, y prome minister a expresa cu e tambe como hurista mester compronde cu casonan ta tarda. El a menciona e caso di Benny Sevinger, “cu el a brasa den su partido, cu el a subi riba e lista di e partido pa protege y defende Benny Sevinger, ta tardando no un aña, ni dos, sino tres aña”, el a bisa.

Igualmente el a sigura cu e tema aki tin su atencion y ta hopi importante pa nan, mientras tanto, nan ta trahando riba e vision nobo pa Arubahuis cu un representacion di Aruba na Hulanda caminda ciudadanonan ta sinti cu nan interesnan ta wordo miho atendi.

Investigacion no ta bay riba Sr. Besaril

Den e conferencia di prensa aki, redactor di Bon Dia Aruba a puntra prome minister si nan ta bay entrega un keho contra Guillfred Besaril – ken ta ex-minister Plenipotenciario – y kico ta su status awor? E ta na cas of e ta trahando den e Gabinete?

Pa cu esaki, prome minister a declara cu Sr. Besaril a tuma su retiro como minister Plenipotenciario y cu ora un persona ta tuma retiro como minister of parlamentario, nan tin un aña di overbruggingstoelage. Esey ta nifica cu e ta den periodo ey. “E ta ambtenaar, e ta un empleado publico prome cu el a bira politico, kiermen e tin su trabao den gobierno tambe.”

Wever-Croes a clarifica cu e investigacion no ta bay riba Sr. Besaril. “E ta un investigacion riba cosnan cu por a bay menos bon den Arubahuis y akinanan no ta un persona so ta den investigacion, sino ta mas persona ta den investigacion.”

Ademas, el a comenta cu te ainda nan no sa si ta bay entrega un keho contra Sr. Besaril pa motibo cu esey specificamente e investigacion ta bay duna. “E ta un investigacion administrativo y unabes cu tur cos ta cla y mi ta haya e consehonan riba mi lessenaar, eynan ta bay indica si mester bay Ministerio Publico.”

El a informa cu el consulta caba cu Ministerio Publico tocante e tema aki pa informa nan “pero aworaki no tin ningun indicacion di esey”, el a señala.

Alabes, tambe a bira conoci cu Sr. Juan Ady Thijsen a wordo huramenta como minister Plenipotenciario y tambe lo representa Aruba na Union Europeo. Prome minister tambe a enfatisa riba e hecho cu señor Thijsen lo ricibi solamente un salario pa eherce e dos funcion aki, mirando cu tin rumornan caba ta circulando cu e lo ricibi dos salario. “Eesaki sigur no ta e caso ya cu señor Thijsen lo haya un salario, e salario di Gevolmachtigde Minister y cu esaki e lo eherce dos trabao. Esaki sigur ta parti di Gabinete Wever-Croes su esfuerso pa contribui na baha gastonan structural den gobernacion.”