Ayera mainta durante un conferencia di prensa di miembronan di Departamento di Salud Publico (DVG), epidemiologo Daisy Ooms a elabora riba estudio di seroprevalencia na Aruba (Anticuerpo contra SARS-CoV-2 den poblacion di Aruba) cu nan ta bay haci conhuntamente cu Rijksinstituut voor Volksgezondheid en Milieu (RIVM) di Hulanda, Hospital Dr. Horacio E. Oduber y otro instancia.
Estudionan aki ta usa un analisis di sanger pa identifica e personanan di un poblacion cu ta desaroya anticuerpo contra Covid-19. E resultadonan di e prueba anticuerpo por aporta informacion riba infeccion anterior den personanan cu tabatin hopi, poco of ningun sintoma.
Ooms a expresa cu nan ta bay investiga cua porcentahe di e poblacion tin anticuerpo contra Covid-19 den su sanger.
Di loke ta trata anticuerpo, el a menciona cu sistema inmunologico ta produci anticuerpo contra e virus. Esakinan ta uni cu e virus y ta haci’e inofensivo. Tambe nan por wordo midi den e sanger. Anticuerpo generalmente ta protege e persona contra futuro infeccionnan, pero no semper.
Di mesun manera, el a splica cu nan ta haciendo e investigacion aki pa motibo cu nan kier comprende e distribucion di Covid-19 na Aruba, acumulacion di inmunidad di e miho grupo cu ta lucha contra e virus y lo enfoca riba un campaña di vacunacion.
Di esunnan cu por participa, Ooms a anuncia cu nan lo tin un muestra di 1.000 persona di diferente edad y di tur districto di Aruba. Nan participacion ta boluntario y anonimo, nan ta espera di haya e mayor cantidad posibel di participacion di personanan, ademas di esunnan cu tambe a haya Covid-19.
E investigacion ta implica cu nan ta bay haci un invitacion pa personanan via un carta, un cuestionario, despues mediante extraccion di sanger y un retroalimentacion riba e resultadonan di analisis di sanger.
E proceso ta cuminsa na unda e personanan ta haya un carta di invitacion na cas. Esaki no ta bay ta dedica na un persona specificamente, segun a aclaria, pero si pa un persona cu ta cay den e categoria di edad cu ta aplica pa estudio. Si e persona no ta cay den categoria aki por ignora e carta.
Despues di e carta, mester yena e cuestionario y di esaki nan a trece dilanti cu nan ta haci un serie di pregunta, na unda ta puntra si kier participa den estudio aki y cu esaki lo ta disponibel den e app di Aruba Health App, na unda e persona ta bay haya un codigo unico.
Ta importante pa destaca cu no cualkier persona por participa den estudio. Den e caso aki e persona prome ta haya e carta di invitacion y den esey ta hinca e codigo cu e app ta duna y despues mester contesta un serie di preguntanan.
Ora cu e persona ta caba cu e cuestionario e lo por traha un cita pa laboratorio pa saca sanger pa por participa den estudio.
