Mañan Director di Impact Blue lo sali den ‘Xxpedition’, un boto cu 300 hende muhe cu lo ta core rond di mundo pa haci investigacion di contaminacion cu micro plastic cu tin den awa.
Juliet Carvalhal, Director di Impact Blue, ta e prome Arubiano cu ta haya oportunidad pa bay den e boto, cu ta acepta solamente 300 hende muhe pa recore mundo pa haci investigacion riba contaminacion den lama.
Xxpedition ta e nomber di boto, caminda nan a scoge Carvalhal di entre 10.000 di persona cu a inscribi pa participa. Pa mañan e lo sali for di Aruba pa bay Antigua, pa asina e por aborda den e boto.
Carvalhal a splica cu el a aplica aña pasa, pero durante e proceso, e mester a haci varios pregunta manera cuanto plastic tin, ki tipo di plastic, di unda e plastic ta bin y esunnan cu nos mes ta uza. Den tur e proceso ey a nace e idea IBLAB, cual ta un programa cientifico di 2 aña pa tur ciudadano.
E biahe normalmente tin un duracion di dos aña, unda Carvalhal lo participa bou di Impact Blue pa studia plastic y toxina den nos lama. “Cada 2 aña lo ta dividi pa 30 diferente leg, den cada leg cada hende muhe por join. Pa e motibo aki ta conta cu 300 hende muhe.”
E lo ta participando den 4 biahe, saliendo pa Antigua dia 20 di november. Nan ta bay Bonaire y despues Aruba. Xxpedition lo ta para na Renassaince Marina dia 6 di december pa 12or di merdia.
Nan lo ricibi muestranan. A traves di estudio nan lo compronde Aruba su plastic, uzando metodo cientifico, cual Carvalhal lo siña den barco. Cu investigacion cu lo realisa, nan lo wak e contaminacion cu micro plastic cu tin den awa y e awa cu ta rond di nos, den nos tera y e plastic cu ta drenta den area di Noord.
E team di investigacion di Impact Blue tambe ta den colaboracion cu varios otro instancia y departamento manera Futura, Bula, Tranquilo, y Scubblebubbles cu lo yuda den investigacion.
Amedee Wever, di departamento di Futura ta comparti cu nan enfoke ta riba tres elemento, ersta ‘people, planet y prosperity’ (hende, planeta y prosperidad). Pa e motibo aki a mira oportunidad pa uni cu Impact Blue pa pone enfasis riba e tres prospecto aki pa Aruba.
Nan centro tin como meta pa crea un plataforma pa ciudadano, asina mas hende colabora, no solamente na nivel academico, pero principalmente hende local, cu colaboracion pa sostenbilidad y otro partner pa haci mas investigacion pa yuda den futuro.
Nan mensahe cu kier trece dilanti ta cu si nan no por midi e problema, no por progresa. “Cu investigacion a logra midi impacto cu e problema tin riba nos isla, pa por sigui bay dilanti, sea e sali negativo of positivo, nos lo sigui cu investigacion y move di eynan pa bay miho”, Wever a expresa.
