Leakmento di datonan medico confidencial ta algo cu a tuma luga na luna di augustus di aña pasa na Aruba ora un lista cu nomber, fam y datonan di hopi hende a wordo publica y na unda tambe tabata informa si nan a haya Covid-19 si of no.
Mirando cu tempo ta pasa y no a tende mas nada di e investigacion cu Ministerio Publico a cuminsa tocante e caso aki, Bon Dia Aruba a tuma nota di un declaracion cu minister demisionario di Salud Dangui Oduber a trece dilanti durante su ultimo conferencia di prensa cu a tuma luga siman pasa hunto cu Crisis Team.
Oduber a splica cu un keho a wordo entrega na Ministerio Publico y internamente tambe nan a haci un investigacion na unda nan a haya conseho caba di parti di departamento di Recurso Humano pero nan ta pendiente ainda di e resultado di e investigacion y e keho cu a wordo entrega, “te ainda nos no a haya e resultado of e conclusion di e investigacion aki” el a sigura.
Di mesun manera, tambe a busca informacion riba esaki cu Ministerio Publico na unda Bon Dia Aruba a wordo informa door di Ann Angela cu “e investigacion ta andando keto bay”.
E lista aki tabata contene nomber di tur esunnan cu a registra como positivo pa Covid-19 den e tempo ey y ta inclui tambe fecha di nacemento, fecha cu nan a sali positivo, adres y otro datonan.
Ta importante pa destaca cu informacion medico di pashentnan pa ley mester ta secreto, ta informacion cu tur dokter, enfermero y tur profesional cu ta traha na hospital of den area di salud ta maneha y cu nan no mester divulga.
E lista aki tabata contene e nomber di aproximadamente 1.000 persona, algun di nan cu Covid-19 activo y otro no, esaki a keda den man di Recherche pa haya sa door di un investigacion ken ta e persona of esunnan cu a comparti e file aki riba plataforma di Whatsapp.
