Investigacion riba gasto excesivo di overtime; ‘Periodieke uitkeuring’ no ta permiti cu gasto di personal por baha

Dos aspecto cu ta hungando un rol riba gasto di personal den aparato gubernamental, ta e periodieke uitkeuring y overtime.

Segun Prome Minister, Evelyn Wever-Croes, e cantidad di empleadonan publico a baha, pero e gasto no a baha mescos. Te hasta tin e tendencia di no baha. El a splica cu a pesar cu nan por a traha cu menos hende mes, nan salario si ta sigui subi, debi cu nan ta haya promocion y tambe un periodieke uitkeuring of aumento periodico, depende di e schaal riba cual e empleado publico ta. E ta un derecho cu empleado publico tin y pa kit’e –segun e prome mandatario– nan tin cu negosha cu sindicato y cambia ley.

P’esey nan ta evaluando otro instrumentonan, mirando cu e asunto di e periodieke uitkeuring no a yuda mucho pa baha gasto di personal. Actualmente nan ta den deliberacion cu sindicato, sinembargo e ta haya cu pa e gremio aki awor e tema cu ta importante pa nan ta e asunto di indexering. Un asunto cu –segun e mandatario– nan no ‘a yega na e tema aki ainda.’

Overtime
Pago di overtime ta otro asunto relaciona cu gasto excesivo di gobierno cu tin Wever-Croes hopi preocupa. E overtime a existi semper, sinembargo actualmente tin un investigacion andando ariba e asunto aki. E aña aki e mandatario no ta kere cu nan por logra domina e gasto di overtime, pero e ta wardando riba e resultado di algun investigacion. E ta spera cu esaki lo por yuda gobierno pa otro aña nan por tin un miho control riba dje.

Investigacion
E prome mandatario a laga sa cu den deliberacion cu e respectivo departamentonan, nan ta investigando e origen y kico nan por haci pa baha e overtime den aparato gubernamental.

Aparte di esaki, tin otro investigacion andando riba asunto di overtime cu ta wordo haci pa e colegio di supervision financiero CAft, cu a ofrece nan mes pa realisa e investigacion aki y gobierno ta dunando su cooperacion. E resultado di CAft –despues di bishita tur departamento di gobierno– lo bin cla entrante luna di september. Contraloria General tambe a yega di haci un investigacion riba overtime y gobierno ainda ta pendiente di por haya nan rapport.

Wever-Croes a bisa cu pa medio di e rapportnan di e investigacion cu diferente instancia ta realisa, gobierno lo por tin un analisis mas profundo di e causa di overtime y ohala cu nan por bin cu un solucion pa atende cu nan. “Gara e toro na su cacho mas miho,” el a haci uzo di e frase popular aki.

Sinembargo, e ta haya cu mientras tin un discusion cu mester baha gasto di overtime, di otro banda, por ehempel nos no por laga nos frontera habri. Tampoco nan no por keda sin pone mas hende ariba diferente warda, y tambe nan mester a atende cu ordo publico y siguridad.

El a trece dilanti e caso di Brandweer, cu ta uno cu ta demanda gasto di overtime. Na prome instante, e pensamento logico ta cu afortunadamente no tin cantidad di candela na Aruba. Pero e cuerpo aki tin un acuerdo of compromiso pa hopi aña caba cu aeropuerto. Ta asina cu pa aeropuerto por cumpli cu regla internacional di International Civil Aviation Organization, (ICAO), nan mester tin disponibel un cantidad minimo di persona constantemente na Brandweer, a pesar cu nada ta pasa y pa tal motibo tin cu paga overtime.