Mescos cu na 2020, lo duna e sosten di likides financiero a base di locual e organo di supervision financiero CAft ta calcula cu e necesidad financiero netto lo ta. E concepto di presupuesto 2021 cu ya a Sali for di Raad van Advies (RvA) pa gobierno ta registra un deficit financiero di 878 miyon florin y un necesidad financiero di 1138 miyon.

Sinembargo CAft a pidi pa cuenta/rapport anual di tur entidad publico y semi publico, manera companianan estatal y fundacion, pa asina haya un bon bista riba e riesgo financiero di pais Aruba. Pero mayoria di nan no a cumpli cabalmente cu entrega di nan cuenta anual. E pregunta cu ta surgi ta: Con lo para cu e ayudo of sosten financiero proximo di Hulanda?

Pa duna contesta na e pregunta aki, minister di Finanzas y Asunto Economico, Xiomara Maduro a declara cu tur instancia di sector publico cu mester cumpli cu nan cuenta anual y ainda nan no a haci’e, “e no ta algo di awor.” For di hopi tempo caba no tur ta cumpli mesun cos. E no ta kere cu exigencia di CAft riba e cuentanan anual aki no mester ta algo cu mester afecta grandemente.

Igualmente el a bisa cu hopi biaha nos ta lesa un rapport di CAft, y nos ta pensa cu pasobra “CAft a pone ta un cos cu a bin di anochi pa mañan. Of pasobra CAft a pone e ta un cos cu asina e ta!” segun e mandatario. Mientras cu e organo di supervision aki no ta pone den nan rapport tur esfuerso cu gobierno a haci pa drecha un situacion. Pero si e ta reconoce cu presion grandi ta wordo poni pa luna di april, ora cu normalmente e informacion aki ta keda cla.

Segun e mandatario tin hopi mas cos na pais Aruba cu pa diferente motibo no ta ‘up to par.’ Mientras cu trabao ta wordo haci pa yega na mehoracion. Pero debi na e situacion actual cu pais Aruba no ta genera suficiente placa ta pone nos den man di Hulanda cu ta pone extra presion pa caba di drecha locual nan a cuminsa cune.

 

Investigacion

Pero como parti di e landspakket, minister Maduro a indica cu lo bin un investigacion riba e fundacionnan cu ta ricibi fondonan for di gobierno. Encuanto kico e investigacion aki ta encera el a bisa cu na medida cu nan tin e agenda di e landspakket lo por tin un bista mas amplio riba nan.

Segun e mandatario tin diferente motibo pakico tin fundacionnan cu no tin nan cuenta anual cla. Riba e tereno aki e ta haya cu tin cambionan cu a tuma luga durante añanan pa trece mehoracion den e situacion di presentacion di nan cuenta anual. Pero e proceso aki no ta cla ainda, y esey ta un motibo cu CAft a bin cu e remarca aki.

El mandatario a indica cu aworaki nan ta trahando riba locual ta bira e trabao cu mester wordo haci pa e di dos kwartaal pa sigura e fondo di likides financiero. E ta haya cu na final importante ta cu CAft ta bin cu nan preguntanan y gobierno por duna nan e contesta pa nos tur por keda den e balans pa locual ta informacion.