E scandal relaciona cu un supuesto caso di fraude den laboratorio di hospital, unda ta wordo e director y su casa, ta hayando mas reaccion y indignacion.

E biaha aki, parlamentario Endy Croes, kende ya den pasado a yega di cuestiona fuertemente e situacion interno relaciona cu maneho di hospital, a pidi pa bin cu un investigacion.

Supuesto caso di fraude
Den su trabou como parlamentario, Croes ta bin denunciando publicamente e proyecto di renobacion y expansion di hospital. Pero e biaha aki, el a bisa cu ‘nos sa cu tin algo andando den hospital’. E scandal nobo a cuminsa cu e denuncia haci den prensa, den cual a bisa cu esposa di e director di laboratorio di hospital a crea un propio compania di laboratorio, CR Lab Services, y a registra esaki riba su propio adres di cas na Hulanda, cual ta un domicilio of residencia.

Segun e articulo publica den columna di Sr. Van der Zee den e corant Amigoe, e compania CR Lab Services basa na Delft tabata encarga di haya e PAP-testnan for di Laboratorio di hospital, pa despues manda esakinan door na otro laboratorio na Hulanda, cual ta haci e test. Despues ta manda e resultado bek pa Aruba. E compania aki, cu director di laboratorio di hospital su casa a establece na Hulanda, tabata funciona manera un trampolin, y nan tabata cobra pa e servicio aki. Pero no tin claridad si e test a wordo haci na Hulanda of na Aruba mes.

Aunke e caso aki a sali divulga den rednan social y prensa, Croes, lo sigui busca mas informacion.

Corupcion y investigacion
Croes a declara cu aparentemente tin un corupcion grandi den e laboratorio. Recientemente el a yega di denuncia publicamente cu hospital a yega di pidi material cu e laboratorio tin cu uza pa nan test, y nan a benta esakinan afo, pasobra nan a caduca. E parlamentario a señala cu nan a haya un potret cu ta ilustra cu 300 mil florin di material di laboratorio cu a caduca, mester a wordo benta na dump. Mientras di otro banda, nan no tin placa pa atende cu nan necesidad mes.

E ta lamenta e desaroyo cu ta tumando luga den hospital, y Croes ta considera cu ta yega momento cu algo tin cu tuma luga riba hospital.

“Nos lo bay ta mas fuerte riba hospital den e dianan nos dilanti,” el a bisa.

Croes a agrega cu tabatin algun reunion publico den parlamento pa atende cu e asunto di construccion di hospital. E no ta descarta cu lo bin cu un reunion publico, mirando e ultimo scandal rond di hospital. Sinembargo, un reunion publico lo keda un escenario pa debati, pero mientras cu no tin cambio aden, nada lo cambia. “Pero nos lo pidi mas tanto pa un investigacion,” el a declara na e matutino aki.

Nan a compronde cu minister Dangui Oduber a cuminsa canalisa pa un investigacion grandi den hospital ta na su luga.

E ta bisa esaki cu tur respet pa tur profesional na servicio di hospital. Tambe e tin aprecio pa nan trabou, pero tur hende sa cu regularmente tin critica ariba hospital. P’esey, e no ta mishi cu e profesionalnan aki, cu ta percura pa cuido di salud. Pero si e ta critica e parti di maneho y di e hunta di supervision, y e ta kere cu mester bin cambio eyden.

Cambio hunta di supervision
Segun Croes, for di inicio di e gobierno actual, e minister encarga cu salubridad publico a pidi e miembronan di e hunta di supervision di hospital (Raad van Toezicht) pa entrega nan retiro. El a menciona entre nan, e directora di departamento di Impuesto. E ta kere cu ta na su luga pa nan cuminsa entrega boluntariamente nan retiro.

Di e forma aki nan por contribui pa duna espacio pa e minister di salubridad publico por drenta atende cu e problematica di hospital manera mester ta, pa cuminsa coregi e problemanan interno.

E ta haya cu henter nos comunidad ta na expectativa di un cambio y nan ta anhela un rumbo nobo den hospital. Si e miembro di e hunta di supervision no ta pidi nan retiro, Croes ta haya oportuno pa minister bin cu un management team pa cuminsa eherce e vision di gobierno actual.

Segun Croes, e constelacion den e hunta aki ta ‘un poco incomodo’. Esaki pasobra solamente dos representante, di un total di shete, gobierno tin presencia pa medio di nan. Algo cu na opinion di e parlamentario tin cu cambia. El a referi cu a tarda mas cu un aña prome cu dos di e miembronan aki a retira, mientras cu esunnan cu a keda a nombra un cu a retira bek. El a tilda esaki manera un ‘wega di caco scondi.’

Retiro di director
E sa cu e mandatario a pidi e director di hospital pa entrega su retiro, y el a pidi e hunta di supervision pa haci esaki, pero nan no a cumpli. Tambe e minister a pidi e hunta aki pa nombra un director financiero, y te ainda nan ta den e proceso aki. Te hasta a pidi nan pa intermedia den eerste hulp pa por drecha e calidad. Pero tur cos ta ‘bay na nan sistema,’ el a bisa.

Croes ta reconoce cu e no ta dokter ni specialista, pero si e ta kere den maneho. Pero tambe e ta kere den duna espacio pa esunnan cu a wordo scogi popularmente por hiba nan vision y nan maneho. Den esaki, e ta haya oportuno pa e miembro actual di e hunta di supervision di hospital, manera bon profesional, entrega nan retiro y coopera cu gobierno. Asina nan por duna espacio pa trece otro vision y bin cu otro profesionalnan cu por coregi y hiba un maneho na gusto y vision di e gobierno.