Parlamentario Donny Rasmijn (AVP) ta anuncia cu lo bin un investigacion pa determina for di unda e marchanan di azeta pisa descubri den e costa noord/oost di nos isla a bini.
E decision aki ta debi ora cu e gobierno di Trinidad a anuncia e composicion di e tarballs y patches di azeta producto di e derame cu a tuma luga den nan refineria Petrolin, dia 23 di april ultimo. “No ta sigur cu e azeta aki ta di ayanan”, segun e parlamentario.
Minister di Energia di Trinidad a raporta den prensa cu e derame ta trata di RGM 380 centistokes fuel oil cu a lek for di un tanki di nan refineria. Nan a raporta cu mas of menos 300 bari di e azeta a lek den lama. Mientras di otro banda ta wordo informa cu ta trata di otro tipo di azeta, esta Bunker tipo C, cu ta un sorto di combustibel pisa uza pa barconan. Si ta trata di 300 bari di RGM 380 centistokes fuel oil ta poco probabel cu e por yega te hasta nos costa. Solamente si e informacion duna no ta cuadra cu e realidad, y cu eventualmente lo trata di otro tipo di azeta mas pisa y mas cantidad cu a lek. Otro hipotesis lo ta cu e tankernan cu ta transporta combustibel a probecha e situacion aki pa flush nan tankinan unda azeta pisa ta bin pega den nos costanan.
Busca drechi prome
P’esey e parlamentario ta kere cu prome nos mester busca drechi y tambe busca nos derechonan pa wak tambe con nos por stop algo similar den futuro. Buscado informacion, sr. Rasmijn a haya cu den varios ocasion tabatin derame di azeta for di e refineria Petrotrin. “Door di varios añanan cada biaha atrobe bo ta haya cu un derame. Pues e por ta cu cada biaha nos lo por haya atrobe e azeta aki cerca nos costa, si ta di nan e ta bin.”
E derame aki cu a tuma luga dia 23 di april a afecta e costanan di Venezuela y actualmente tin azeta haya na Bonaire, Corsou y Aruba. “Aparentemente Aruba ta esun mas afecta”, e parlamentario ta bisa. Un accion di limpiesa di e azeta aki ta tumando luga den nos costa nort; pero locual nan ta bay haci despues ta identifica e productonan aki. Nan lo tuma algun muestra pa manda afo pa determina exactamente ki sorto di azeta e ta. Despues pa medio di autoridadnan competente lo busca informacion for di Trinidad pa compara e azeta haya na Aruba cu esun di nan. Asina lo identifica si e ta of no e mesun tipo di combustibel.
Mientras cu parlamentario Rasmijn ta laga sa cu e potretnan cu nan ta wak y cu no ta oficial ta mustra un tanki cu azeta cu ta core for di dje. Pero nan ta wak cu e tanki aki no tin niun sorto di proteccion. Segun standard mester tin manera un proteccion pa den caso cu e azeta ta sali for di e tanki e muraya di proteccion cu lo tin rond di dje lo contene e combustibel aki. Segun locual e por a mira for di e potret ta trata di gewoon un tanki cu beton y cu e azeta ta cay directamente na e awa.
“Nos tin cu bay wak si esaki ta cuadra. Mi ta kere cu e ta algo mas interno.”, el a bisa. Tin cierto protocolnan un di nan ta Marpol via Panama, unda nos mester mantene nos mes na e protocol aki teniendo na cuenta e standard nan pa evita e tipo di problema aki.
E parlamentario a laga sa cu henter e procedura aki lo mester tuma luga, ya cu loke a sosode cu e derame aki ta algo basta serio pa nos medio ambiente y sigur pa nos costanan. Igualmente Aruba y su partnernan den Reino (Bonaire y Corsou) ta islanan turistico, y e aspecto di medio ambiente ta hopi importante pa nos. E ta kere cu mester bin cu mas presion pa defende nos costanan, ya cu nos tin refineria y terminal, pero nos ta percura pa traha segun normanan di siguridad pa evita cualkier derame den nos areanan.
