Di antemano tabata sa cu ‘feitenonderzoek’ no ta logra…
Dia cu Parlamento a comunica den reunion publico cu ministro encarga cu Salubridad Publico y a yega na un mocion pa pidi (exigi?) un ‘feitenonderzoek’, por a pronostica caba cu tanto tempo despues no tin resultado ainda. Awor, manera por a predeci tambe, e ministro ta desea di duna prioridad na e proyecto di e sala di operacion nobo, envez di perde tempo cu e investigacion ta ken a causa e problema. Di un banda comprendibel, ya cu e construccion ta tumando luga caba y mester haci pura pa keda cla cu añadi e parti di sala di operacion. Di otro banda, e asunto di e sala ta mustra straño ta importante conoce e echonan, sino aki dies o binti aña ainda e asunto ey lo persigui nos, lo bo por pensa.
Pero, no ta posibel pa e ministro sigui e proceso cu a tuma luga ora a bay investiga e asunto di ‘hedging’? Aya e ministro a duna un oficina di renombre e encargo pa haci un investigacion parcial, lagando afo e nivel di ministro mes y e compania madre. Bon pensa, nos por bisa. A logra haya un ‘scapegoat’ tambe den persona di e director di WEB Aruba NV, y a yega na un salida cu ‘golden handshake’. Cla. Asina berdadero ehecutivo cu sa nan trabao ta haci e cosnan aki, berdad? Excepto un grito isola for di seno di oposicion de bes en cuando, tur cos a calma den e asunto ey. Y nos ta sigui tur luna sagradamente pagando un tarifa exagera pa awa y coriente, y ni e famoso musca no a bula. E ta un disco rasca caba, pero sinembargo: excelente trabao, y ainda falta?
Nos no ta comprende cu ministro di Salubridad Publico no ta bay den e mesun rumbo aki, talbes contrata e mesun accountancy pa haci e investigacion; nan tin e experiencia caba y nunca ‘mester manda mucha bay haci trabao di hende grandi’, toch? Den e lunanan cu a transcuri, nan lo a keda cla caba, e ministro lo a sali ileso, di mes caba pasobra su coleganan di partido den Parlamento nunca lo tabatin e intencion di laga e compañero trompica, toch? Nos por tabatin e resultado riba mesa, e ministro ta haya tur oportunidad pa zundra tocante e ‘scapegoat’ cu nan lo a detecta, e lo a kita e tambe di trabao, laga e persona bay hues si e kier, pero en todo caso nos por a concentra riba e issue principal: cuanto e chasco aki ta bay costa extra, finalmente?
Pakico anto encarga e conseho di supervision di hospital mes pa bay investiga internamente, nan ta acaso ekipa pa haci e tipo di investigacion aki? Cu tur respet, no ta hende ocupa cu nan otro responsabilidad diario unda nan ta traha, anto nan mester bay hunga pa recherche den nan tempo liber? Of nan a para tur reunion te ora nan keda cla cu e investigacion? Ta p’esey nan no a logra haya un director general ainda anto; nan ta mucho ocupa cu busca e echonan?
Finalmente, nos ta kere cu por apoya e ministro pa dal bay cu e proyecto di construccion di e sala di operacion, y no preocupa mas cu e mocion di Parlamento. Ora yega e momento di haci algo, e fraccion gubernamental lo resulta di ta nada mas cu e ta: e segunda tanda di partido, e categoria B, e backbenchernan, e cacho cu mag gruña y hasta ladra de bes en cuando, pero morde… esey si nunca. Por lo tanto e ministro por drumi trankilo; si e logra haya e ‘culpabel’ si of no, tampoco lo ta relevante mas.
Pa loke ta e proyecto di construccion di e sala di operacion mes, ni e suma cu e compania lo bay pidi no ta relevante, pasobra a elimina e competido caba mas tempran den e proceso, asina ta cu, manera e Hulandesnan sa bisa:”waar hebben we het over?” Djis paga e suma cu nan lo exigi pa inclui e obra aki den e proyecto y cla. Naturalmente esaki lo bay tin su consecuencia pa e suma cu nos mester paga despues den e proximo 20, o ta 25 aña? Nos ta perde conteo cuanto aña exactamente nos ta horca, cu tanto proyecto financia pafo di presupuesto, cu nos mester paga si.
E unico fabor cu e ciudadano consciente por pidi, ta pa nan no molestia hende regularmente cu palabra bunita manera ‘bon gobernacion’, of mas bunita ainda: ‘integridad’. Si no bin mucho reaccion for di opinion publico pa e asunto aki, lo ta pasobra mayoria di hende tin otro preocupacion na nan cabes pa bay mete cu un asunto cu ta parce completamente ‘pre-cooked’ entre fraccion gubernamental den Parlamento y gobierno mes. Mira di e banda ey nos por bisa cu e ministro a sali afo cu un bon idea, y esey ta pa dal bay cu ‘business as usual’ y no perde su tempo, y di nos, cu asunto trivial manera un sala di operacion ‘lost in action’.
Publica den Bon Dia Aruba 27 november 2015
