Tin un investigacion interno di corupcion andando den DOW pa algun luna caba y te ainda director Marlon Croes ta nenga di divulga algun informacion te ora cu e rapport keda cla.
 
Den luna di April di e aña aki, medio di comunicacion ‘Caribisch Netwerk’ a publica cu tin un investigacion interno andando den DOW en coneccion cu fraude. Esaki ta un investigacion relaciona cu empleadonan cu ta sospecha di haci negoshi cu pintamento di mapa di construccion. Algun trahadonan ya caba mester a resigna pero director di DOW ta nenga di divulga mas detaye ni confirma ningun informacion. Bon Dia Aruba a puntra sr. Marlon Croes si e por a comparti algo di esaki pa locual el a bisa:  ”E ta un punto delicado. E rapport no ta cla ainda y nos no por duna ningun informacion. Ora cu e rapport keda cla nos por tuma un decision anto te aworaki e ta keda un ‘feiten onderzoek.” Segun Ministerio Publico, DOW lo tin cu entrega un ‘aangifte’ cerca nan pa nan por forma parti di e investigacion. ”Mi ta calcula cu nan ta investigando of miho dicho, ta lagando un compania haci e, pa despues a base di e resultadonan y conclusionnan, dicidi kico nan ta bay haci,” vocero di OM sra. Ann Angela ta comenta.
Server nobo 
DOW a caba di cambia un server nobo cual segun sr. Croes, e ta mas eficiente y confiabel.  Sr. Croes no por a confirma tampoco si e cambio aki por ta relaciona cu e investigacion andando, sin embargo e ta bisa: ”Pa ‘redundancy’ nos ta bay haci un ‘off site backup’ dus no na DOW mes, nos ta ‘backup off site’ pa si algo mester sosode, algo mester bay malo manera un server crash of el a kibra, pa nos por recupera nos data hopi lihe pa ta bek den operacion dentro di 48 ora.”  Documentonan di DOW awo ta wordo warda den nan servers anto cada funcion tin nan ‘toegangsrechten’.  Den otro palabra, empleadonan por solamente tin acceso na cierto documentonan a base di nan funcion den e organisacion. Esaki segun sr.Croes ta pa percura pa tin mas siguridad den e maneho di data den e organisacion. E ta sigui bisa cu:  ”E ta un sistema cu desde 2014 nos a cuminsa cu e pensamento ey anto den 2015 nos a haci basta inversion y basta cambio riba dje anto pa fin di e aña aki, nos mester caba e ”off site” backup. ” E compania di comunicacion Setar ta un partner awo yudando DOW den esaki pa tin nan server completo den funcion.