Riba e hecho cu recientemente a tuma luga, unda un tata a saca su yiu menor di edad a for di Aruba sin passport y sin autorisacion di e mama (Toestemmingsformulier) cu mester wordo legalisa na Departamento di Asunto Huridico, a cuminsa cu un investigacion pa sa precies kico a bay robes den caso aki.
Inmigracion Aruba a kibra su propio maneho cu a wordo rectifica dia 6 di juli 2022 cu e obhetivo pa derecho di mucha y pa preveni secuestro di mucha via aeropuerto di Aruba.
Den un articulo e siman aki, Bon Dia Aruba a trece dilanti fayonan cu instancianan a comete na momento cu un mucha di cinco aña a sali for di Aruba cu su tata via aeropuerto sin paspoort y sin un permiso di e mama.
Un articulo cu a causa reaccion di usuarionan di rednan social cu a enfoca riba un problema di famia, pero mester remarca cu esey no ta relevante, sino e manera con e mucha por a sali for di Aruba, esey tabata e “esencia,” di trece dilanti loke a pasa debi na fayonan di instancianan.
Awo por confirma cu tin un investigacion riba con e fayonan aki a tuma lugar. Mas informacion di e caso aki ta bay ta disponible den nos siguiente edicion di Bon Dia Aruba.
