Durante e conferencia di prensa di ayera mainta, redactor di Bon Dia Aruba a puntra na minister di Salud y Turismo, Dangui Oduber ki ultimo informacion e tabatin tocante e investigacion denomina como “VacunaGate” na unda un grupo di persona a bende aproximadamente 800 carchi falsifica di e vacuna contra Covid-19.

Pa cu esaki, minister Oduber a splica cu e investigacion a culmina y ta cla “e personanan cu a wordo haya sospechoso lo wordo persigui pa Ministerio Publico.”

Asina mes, el a afirma cu otro medionan y oposicion a haci esaki mas grandi di loke realmente tabata.“A wordo papia cu tabata miyones di florin cu a wordo malversa of a haya di un forma ilicito, cu ta miles di certificado di vacuna lo a wordo bendi. Pero na final segun loke ma comprende tabata menos di 800 certificado di vacunacion contra vacuna di Covid-19 cu lo a wordo bendi na un forma ilegal y esey a cuminsa un investigacion di e melding cu a sali for di e ministerio y DVG,” el a señala.

Ademas, el a enfatisa cu no tabata trata di ni un miembro cu a forma parti di su bureau. “Niun hende tabata riba nos payroll, tabata contractnan cu a wordo busca temporalmente pa yuda den e proceso di vacuna. Na final di dia nos a vacuna casi 80.000 hende y nos tabatin mester extra personal pa yuda nos den esaki y den extra personal lamentablemente tabatin algun hende cu a mal usa e autoridad y e mal posicion pa haci loke nan a haci. Y despues cu e melding a wordo haci pa ministerio y DVG, un investigacion a tuma luga y na final di dia, segun informacion cu mi ta dispone di dje, ta tres sospechoso y nan lo mester paga pa loke nan a haci y nan lo wordo persigui pa Ministerio Publico,” el a informa.

Hechonan

Caso di VacunaGate y denomina pa Ministerio Publico como “Anglo” a cuminsa haya forma den luna di augustus di 2021. Un fuente di departamento di Salud Publico (DVG) a acerca na Bon Dia Aruba cu informacion concreto tocante posibel falsificacion, benta y legalisacion di carchinan di vacunacion di Covid-19 riba Aruba Health App.

E fuente e acerca un reportero specifico di Bon Dia Aruba na unda cu el a informa cu tabatin iregularidadnan tumando luga pa loke ta trata e carchinan y sticker di vacunacion di Covid-19. Pero na mesun momento e no por a bisa nada, pa motibo di miedo pa represalia contra su persona. Tambe e fuente a señala cu un lote di carchi di vacunacion a ser perdi hunto cu un par di roll di stickernan di Pfizer- BIONTECH; e lote di carchi cu Aruba a haya ta solamente un number tin riba dje cu ta 012566, cu ta identifica cu e carchi ta di Aruba.

Lunanan despues a bira conoci cu tres persona tabata e sospechoso den e caso aki na unda manera minister a afirma ayera, nan lo wordo persigui, aunke den esaki no ta trata di miyones di florin. E punto ta cu nan a comete actonan castigabel y nan tin cu responsabilisa nan mes pa esey.