Mediante un comunicado di prensa di Ministerio Publico, ayera tardi a informa tocante un investigacion di polis cu tabata tumando luga pa loke ta trata e caso di maltrato na un persona na Bushiribana.

Den e comunicado, Ministerio Publico ta informa cu Polis a haci investigacion siman pasa di un sucedido cu lo a tuma luga diahuebs 4 di januari ultimo den vecindario di Bushiribana. E incidente aki lo a encera cu un persona lo a ser maltrata pa cuatro homber, cu lo a purba cend’e na candela tambe.

Diahuebs 4 di januari, Cuerpo Policial di Aruba a informa medionan local di un caso na unda pa 18:57 di atardi nan central a haya e notificacion di un caso di un persona cu lo a mester a ser maltrata pabao di Bushiribana y e persona maltrata lo tabata den un di e trail cu ta ser usa pa ciclistanan.

Polis a indica cu nan central a despacha patruya di polis como tambe e helicopter di polis pa asina cuminsa cu un buskeda pa cu e persona.

Despues di un rato e helicopter di polis a localisa e persona, ken ta un hende homber, a guia e patruya pa por yega na sitio na unda e persona tabata. Patruya a haya e persona aki y a transport’e te na altura di Matividiri pa asina personal di ambulance por a dun’e tratamento medico y despues a transport’e pa hospital.

Den un prome rapport Cuerpo di Polis a señala cu segun e victima mes a sigura cu e lo a ser maltrata pa 4 homber bisti full na preto y cu probablemente nan lo kier a cende na candela.

Recherche a bay na e sitio como tambe polis tecnico, pa asina cuminsa cu e investigacion cu ayera a culmina. Despues di e investigacion, a yega na conclusion cu nada di esey a tuma luga y cu e persona en cuestion tin un comportamento confundi.

E hecho aki a causa conmocion den comunidad, caminda reaccionnan riba rednan social tabata basta indicando e insiguridad cu Aruba por ta sufriendo na cualkier parti di e isla, specificamente pa esnan cu ta haci uso di e trailnan cu nan bicicleta. Di mesun manera algun otro a yega di relaciona e caso aki cu otro na unda un persona a ser haya morto band’i caminda, tambe den mesun area. Na final, nada no a tuma luga.