Investigacion di DNA ta revela… Invasornan a casi caba cu e prome pueblo Caribense hopi prome cu e Spañonan a yega

Datonan genetico nobo di wesonan antiguo ta sugeri cu mariniernan Sur Americano a causa desaster riba e habitantenan di e islanan Caribense.

Cubriendo un miyon di miya cuadra y cu mas di 700 isla, Lama di Caribe tabata un di e ultimo luganan colonisa pa Americanonan nativo mientras nan tabata explora y asenta den Nort y Sur America. Arkeologonan pa largo a lucha pa determina e origen y movemento di e mariniernan intrepido aki. Awo, danki na material genetico saca di e residentenan antiguo di Caribe, e historia invisibel di e archipelago tropical aki ta saliendo na luz.

Entre e hallazgonan sorprendente ta cu mayoria di e habitantenan original por a keda elimina pa e mariniernan Sur Americano mas di mil aña prome cu e invasion Spaño cu a cuminsa na 1492. Es mas, poblacionnan indigena di islanan manera Puerto Rico y Hispaniola tabata hopi mas chikito na momento di yegada di e Spañonan cu loke a kere anteriormente.

Extraccion di DNA for di wesonan den luganan cayente y muha manera e Caribe tabata imposibel te cu algun aña atras. Pero danki na avancenan grandi den tecnologia genetico, un laboratorio di universidad di Harvard maneha pa geneticista David Reich a logra recupera DNA di 174 individuo excava na sitionan for di Venezuela te Bahamas. E resultadonan, publica dia 23 di december ultimo den e journal Nature, ta yega net despues cu un documento den Science na juli cu a analisa e genoma di 93 individuo Caribense antiguo na un laboratorio di Universidad di Cophenhagen. Danki na e hallazgo, ‘nos por pinta un potret hopi detaya di e historia migratorio inicial di Caribe’, segun Johannes Krause, director di e Max Planck Institute for the Science of Human History y co-autor di e documento den Science.

Ambos estudio ta confirma cu un ola di agricultornan cu tabata traha cu klei – conoci como e hendenan di Era Ceramico – a sali riba canoa for di e costa nort-oriente di Sur America cuminsando alrededor di 2,500 aña atras, y a bay di un isla pa otro den Caribe. Sinembargo, nan no tabata e prome colonizadonan. Riba hopi di e islanan nan a encontra un pueblo cu a yega 6mil of 7mil aña atras for di e costanan di America Central y nort di Sur America.

E pueblo aki – conoci como hende di Era Arkaico – ta parce di a disparce en gran parti poco despues di yegada di e mariniernan . Tin solamente rasgonan genetico limita di individuonan Arkaico den e hendenan di Era Ceramico, un señal cu e dos gruponan no a mescla comunmente. E ceramicistanan, ken ta relaciona na e pueblonan actual di habla Arawak – a suplanta e habitantenan anterior – ta supone mediante malesa of violencia – mientras nan a asenta den e islanan nobo.

Pero tin algun excepcion intrigante cu ta pinta un bista mas compleho di e interaccionnan entre e dos pueblonan distinto aki. “Loke ta remarcabel ta cu e forma di bida Arkaico ta parce di sobrevivi na Cuba occidental te alrededor di 900CE”, segun William Keegan, arkeologo na Museo di Historia Natural na Florida y co-autor di e estudio den Nature. “Aparentemente nan tabata biba sin molester y cu tiki mescla.”

Descubrimento provocador
Un di e hallazgonan mas provocador di e estudio di Harvard ta cu e poblacionnan indigena di e islanan grandi manera Puerto Rico of Hispaniola tabata hopi mas chikito na momento di yegada di e Spañonan compara cu loke registronan Spaño ta sugeri.

Un decada despues cu Cristobal Colon, un frère Spaño, a calcula cu tabatin hasta 3.5 miyon hende riba Hispaniola, awendia Haiti y Republica Dominicana. Pero extrapolacion di datonan genetico, basa riba modelonan matematico nobo, ta mustra apenas diesmiles di habitante. Esey ta trece pregunta e asuncion antiguo di centenares di miles, si no miyones, di hende indigena cu a fayece di malesa y otro impacto di invasion Europeo.

“E maneho nobo aki pa calcula tamaño di poblacionnan antiguo tin potencial pa revoluciona loke nos ta compronde di migracion y cambionan cultural den pasado”, Krause a bisa.

Mientras cantidadnan grandi di hendenan indigena a fayece despues di yegada di e Spañonan, estudionan genetico ta mustra cu nan DNA ta sobrevivi den isleñonan moderno, mescla cu genes di nan colonisadornan Europeo y esclavonan Africano.

Cantidad di gruponan indigena a alega cu cientificonan – hopi biaha Europeo- y Mericanonan blanco – no ta consulta nan, of mustra respet adecua pa nan tradicionnan, mientras ta investiga nan origen. Sinembargo den e caso aki, e autornan di Nature a bisa cu nan a colabora cu comunidadnan descendiente como tambe academiconan den Caribe pa compila y analisa nan data. E investigacion a conta cu sosten en parti di un donacion di National Geographic Society.

Conexion
Un misterio cu ainda mester resolve ta con poblacionnan isleño relativamente chikito a evita di mescla cu otro durante tanto siglo. No tin señal di ningun migracion grandi subsecuente for di e continente. Pero arkeologonan ta bisa cu e evidencia nobo ta punta riba contacto extenso di isla pa isla cu probablemente a yuda sigura diversidad genetico.

E investigacion publica den Nature ‘a resalta e conectividad di pueblonan den e region’, segun Jada Benn Torres, un antropologo genetico di Vanderbild University kende no tabata directamente involura den e estudio. Torres y su coleganan ta bisa cu e proximo stap ta pa compronde e vinculo entre e isleñonan den loke a keda un sistema relativamente cera te cu yegada di e Spañonan na 1492.

“Esaki tabata un region dinamico y interconecta den mundo”, segun Miguel Vilar, antropologo di Universidad di Maryland. E historia di Caribe, el a bisa, ‘finalmente ta siendo comprondi mediante DNA den formanan cu arkeologia so no tabata capaz di haci anteriormente’.