E siman aki Controlaria General di Aruba ta publica nan investigacion riba e Cuenta Anual di Pais Aruba pa aña 2018. E rapport ta disponibel via www.rekenkamer.aw.
“Na momento cu nos a asumi nos responsabilidad como Minister di Finanzas di Pais Aruba nos a traha na un manera serio pa atende cu e finanzas publico precario di Pais Aruba”, segun un comunicado di gobierno. “Despues di un periodo di 8 aña den cual a redobla e debe di Pais Aruba, dificilmente por a drecha e situacion den un aña di tempo. Si nos a percura pa traha riba un Memorandum Financiero y Economico cu a mustra e caminda pa cana pa yega na mehoracion. Su frutonan nos por wak den 2019 na unda cu Aruba a cuminsa recobra credibilidad financiero y tur rapport di evaluacion financiero y economico di Pais Aruba ta indica e progreso aki. Lamentablemente COVID19 ta hinca Aruba den un situacion hopi mas dificil y hopi esfuerso haci ta perde nan relevancia. Nos ta drenta den un scenario financiero aun mas dificil. P’esey ta tempo atrobe pa nos ahusta nos belanan y haci e cambionan necesario pa nos por nabega e lama bruto nos dilanti cu e forza di coherencia y resiliencia cu Aruba ya ta conoci p’e.”
“Dentro di poco ta spera cu Parlamento di Aruba por trata e Cuentanan Anual di Pais Aruba di 2016, 2017 y 2018 pa asina nos por cera e ciclo presupuestario di dicho añanan di gobernacion” Minister di Finanzas, Sra. Xiomara Maduro a trece dilanti.
