‘Awa di riool den lama pa oranan largo’

Minister Otmar Oduber (POR) ta informa cu nan ta investigando un ambtenaar di RWZI Bubali cu a bandona trabou y asina awa di riool por a drenta lama pa ‘oranan largo’.

“Ora cu gobierno actual a asumi responsabilidad, tabatin diferente ambtenaar cu mester a bay bek nan departamento y otronan cu a bay cas segun terminacion di nan contract. Tabatin un caso specifico di un ambtenaar di DOW Noraima Vidola cu aña pasa tabata envolvi den un sosedido cu a causa cu DOW ya no ta desea di tin e señora den su servicio mas, como cu e persona a comete un acto cu inaceptabel pa loke ta su responsabilidadnan laboral.”

E ambtenaar en cuestion tabata traha na e Waterzuiveringsinstallatie (RWZI) di Bubali. “El a bandona su pia di trabou sin notifica niun hende cual a conduci cu pa oranan largo e awa di riool cu ta bin na e RWZI a bay lama. Ocasionando consecuencianan grandi negativo pa nos medio ambiente y naturalesa. Un acto contra derechonan y tratadonan internacional considerando e magnitud di e daño”, segun e mandatario den un relato.

E persona despues no kier a duna oido na director di DOW pa raporta y responsabilisa su mes tampoco y al contrario a tuma un actitud di ‘niun hende no tin nad’i bise’, asina e minister ta bisa. “E ambtenaar a wordo protegi tur tempo pa e minister anterior di Infrastructura door di a pone‘ter beschikking di e minister.”

Na momento cu gobierno a cambia e persona mester a bay bek su departamento pa cual DOW a bisa cu no ta acepta e persona. Minister anterior a purba overplaats e persona pa un otro departamento esta Ministerio Publico (OM). Sinembargo OM a mustra tambe di no kier e persona, mescos a tuma luga tambe cu Departamento di Salubridad Publico. “Te cu na cierto momento e persona a wordo yama pa presenta na pia di trabou bek cual e no a haci tampoco y a bay cu a.o. y ta cu a.o te na e momentonan aki. A pesar cu e tabata cu AO, nan a mira cu e persona tabata bay fiestanan y carnaval mientrastanto, cual no ta comportacion adecua pa un ambtenaar riba AO”, segun e relato di parti di minister Oduber.

“Consecuentemente a tuma e decision recientemente cu ta prohibi entrada di e persona na su trabou anterior. Medidanan disciplinario a cuminsa contra dje a base di e reportahe cu DOW a traha di e caso. E caso ta wordo investiga pa deduci exactamente cuanto daño a wordo cometi, pa mira si cierto momento lo por pone e persona para responsabel pa esaki. No por permiti cu e tipo di cosnan aki ta tuma luga, un bon ambtenaar mester actua manera un bon ambtenaar y mester tin e responsabilidad tambe. Tin dos hecho importante cu ta hunga un rol esta e hecho di negligencia di trabou cu a tuma luga y e hecho cu riba AO tabata sali fiesta.”

Mester enfatisa cu e persona nunca a presenta na pia di trabou desde despues di e incidente y ta cobrando keto bay. E ambtenaar mester wordo brinda e oportunidad pa duna su banda di medaya tambe, y unabes cu esey wordo brinda, e ora decisionnan lo mester wordo tuma den un Landsbesluit cu gobernador ta firma hunto cu Gobierno. Tur cos ta den man di DRH pa actua y pa duna straf disciplinario, segun e minister.