Algemene Rekenkamer Aruba (ARA) a presenta e resultado di nan investigacion tocante instancianan cu ta poni na un distancia di Gobierno di Aruba den e rapport “Op aftsand, maar toch dichtbij”. E investigacion a investiga profundamente seis instancia y un di e instancianan aki ta Fundacion Lotto pa Deporte, cu tambe tabatin un resultado financiero negativo.

Fundacion Lotto pa Deporte (FLPD) a ser funda dia 12 di maart 1982 pa medio di un acto notarial cu ta contene e statuto di e fundacion. Pa medio di Decreto di Isla 149 a designa FLPD como e entidad cu personalidad legal, cu exclusividad pa por organisa y tin loteria pa medio di competencianan di deporte, lotto of biyete di raspa.

Conforme cu Ordenansa di Loteria 150, FLPD tin e permiso pa e loterianan aki na Aruba. E obhetivo principal di FLPD ta adkisicion di fondo pa medio di organisa lotto, competencia di deporte, loteria di raspa, otro tipo di loterianan y wega di suerte cu ta permiti pa un instancia competente.

E gasto di fondo segun e plannan di gasto cu ta beneficia entidadnan cu ta traha pa beneficio di publico general y cu ta enfoca specialmente riba deporte, maneho, explotacion y mantencion di e facilidadnan di deporte, recreacion y centronan di evento y otro facilidad cu ta financia completamente of parcialmente pa e fundacion.

Desde cu FLPD a keda funda, e statuto a cambia varios biaha. Tambe FLPD a firma y cambia contractnan cu terceros, relaciona cu apoyo pa actividadnan di loteria y otorgamento di fondo na instancianan di deporte. E contractnan aki y e structura scogi tin un efecto directo riba e operacion di FLPD, e situacion financiero di FLPD y e relacion cu Pais Aruba.

E relacion entre FLPD y e Pais ta basa riba e Ordenansa di Loteria, pasobra e Pais, basa riba e ordenansa aki, a duna FLPD e permiso pa organisa y tin loterianan. E permiso ta otorga pa e minister di Husticia y Obranan Publico na un entidad cu personalidad legal, cu den e caso aki ta FLPD. E intencion ta cu FLPD ta crea fondonan cu por beneficia e entidadnan cu ta traha pa beneficio di publico general, cu ta enfoca specialmente riba deporte na Aruba. E Ordenansa di Loteria contene regla tocante loterianan y FLPD ta depende di e condicionnan cu e Pais ta pone pa mantene su permiso.

FLPD tin tambe un relacion financiero cu e Pais den forma di un prestamo cu e Pais a duna FLPD, pa un suma di Afl. 17 miyon. Den 2009, Pais Aruba a pone fondo disponible pa e construccion di tres facilidad di deporte. E prestamo tin un termino di 25 aña, cu un interes di 2.5% y un periodo sin pago pa e prome 10 aña. Esaki a ser aproba pa Parlamento di Aruba.

Na aña 2020, FLPD a haci un solo pago di Afl. 1.5 miyon. Na momento actual, no tin pago di e prestamo. Durante negociacionnan di contract cu a tuma luga den 2022, FLPD a pidi Pais Aruba pa prolonga e periodo di pago di e prestamo.

Den e tabel 6.1 por mita cu den 2018 y 2019 e gastonan tabata mas halto cu e ingreso. Tabel 6.2 ta mustra cu e loteria ta genera entre Afl. 15.5 y Afl. 17 miyon di ingreso neto. E gastonan directo di cerca di Afl. 10 miyon ta ser paga na Canadian Bank Note Aruba N.V. (CBNA) Algun di e gastonan operacional cu ta pertenece na CBNA, tin tambe gastonan operacional cu ta pertenece na FLPD, pa un cantidad di entre Afl. 0.5 miyon y Afl. 1.8 miyon durante e aña cu a pasa.

E grafico 6.1 ta mustra cu e ‘gastonan di operacion’ (total di gasto CBNA y FLPD), cu ta exclui e costonan di ingreso, ta e gastonan mas grandi durante e aña cu a pasa. E gastonan relaciona cu Fundacion Facilidadnan Deportivo (FFD) (liña geel) a ser carga pa FLPD prome cu 2013. E cantidad aki a cambia den 2013, pasobra desde e tempo ey, ta directamente for di e Presupuesto di Pais Aruba un subsidio di cerca Afl. 3 miyon ta ser duna na FFD. E subsidio pa fundacion FFD ta parcialmente pa financia e personal di FLPD, cu ta maneha y mantene e facilidad di deporte, cu den 2012 a ser traslada pa fundacion FFD.

Aunke e periodo di investigacion di ARA ta keda di 2018-2020, pa duna e imagen completo, e cifranan disponible for di 2010 ta ser presenta, pa motibo di e cambionan di contract cu a tuma luga den 2011.

E capital netto tabata den 2010 Afl. 9 miyon y den 2020 a cay pa negativo Afl. 5.5 miyon. E caida mas grandi ta visibel den 2013, cu segun FLPD ta relaciona cu e reevaluacion di perdida cu ta relaciona cu e Compleho Deportivo Guillermo Prospero Trinidad for di 1999-2011 pa un suma di Afl. 4.6 miyon. E gastonan di FLPD ta structuralmente mas halto cu e ingreso durante e aña cu a pasa, cu e excepcion di aña 2015 (minimo) y den 2020.

Buki 2 BW Titulo 2 162 ta contene tur regulacion tocante e fundacionnan, incluyendo e regulacion tocante e rendimento di cuenta. Pa tur e entidadnan cu tin personalidad legal cu ta nombra separa den Buki 2 BW, ta cu e comision ta obliga pa aña pa aña den un periodo di ocho luna despues cu e aña di buki ta caba, por a haci un cuenta anual cu por lo menos tin un balans y un estado di ingreso y gasto, y pone esaki riba papel.

Buki 2 BW ta contene regulacionnan separa pa e N.V., tocante e cuentanan anual. Den e regulacion aki ta indica cu e statuto di e fundacionnan por determina cu e articulonan cu ta regla e cuentanan anual, ta aplicabel pa e fundacion.

E supervision di e minister di Deporte riba FLPD ta mayormente ser realisa pa medio di e cuentanan anual. Sinembargo, tin un retraso den e entrega di e cuentanan anual (ultimo cuenta ta di 2020).

Segun e statuto di FLPD, e comision ta obliga pa aña pa aña den un periodo di tres luna despues cu e aña di buki caba, por haci un cuenta di e fundacion, cu ta consisti di un balans y un estado di ingreso y gasto cu e splicacion necesario y presenta esaki na e Conseho di Supervision pa aprobacion.

E Conseho di Supervision ta apunta un contador registra y/of un experto pa investiga e cuenta prome cu e por bay pa aprobacion. Aprobacion di e cuenta pa e Conseho di Supervision ta duna e directiva liber di responsabilidad pa e maneho di e aña di buki anterior, basta esaki keda cla di e documentonan entrega y cu den e aprobacion no tin otro decision cu a ser tuma.

Liber di responsabilidad ta nifica cu e presidente ta libera di responsabilidad of cu e ta responsabel pa e maneho. E comision ta manda e cuenta aproba den un periodo di shete luna despues di e aña di buki cu caba pa conocemento di e minister di Deporte.

FLPD no a cumpli cu su obligacion di rindimento di cuenta na tempo pa e añanan 2018, 2019 y 2020. E cuentanan anual di 2018 y 2019 a ser aproba den mei di 2021 pa e Conseho di Supervision y e cuenta di 2020 a ser entrega december 2023.