Investigacion anterior a mustra 50% di sobrepeso entre hoben

En conexion cu investigacion cu lo tuma luga riba e tema di sobrepreso y obesidad entre mucha na Aruba, Wit Gele Kruis tambe a comparti informacion di investigacion cu a tuma luga den pasado.

Gino Goeloe a duna di conoce cu nan a yega di haci investigacion conhuntamente cu jeugdgezondsheidszorg, DVG, CBS, nan departamento WGK y dokter Anne-Mieke Oudshoorn, kende ta kinderarts neonatoloog.

For di basta aña pasa nan a constata cu tabatin mucha cu tin sobrepeso na Aruba. E ta bisa cu actualmente por bisa cu 50% di muchanan di 12 aña di edad tin sobrepeso of ta obeso. Esey ta nifica pa Aruba cu for di un edad hoben por bin complicacion manera diabetes y malesanan mas avansa ora ta bira grandi.

Wit Gele Kruis a haci e programa na television pa papia tocante sobrepeso pa asina keda educa comunidad riba e consecuencia, di malesa cu lo por trece. Goeloe ta splica cu awendia tur cos ta relaciona cu sobrepeso ‘hasta Alzheimer’.

Pero pa bay den mas profundidad cu e problema ‘na e raiz’ lo bin cu investigacion cerca e baby ora e nace. Pa e motibo aki a acerca Oudshoorn, kende ta un kinderarts cu ta traha na Aruba pa hopi tempo y conoce e sistema di e pais.

Segun Goeloe 50% di e muchanan cu tin 12 aña tin sobrepeso of ta obeso, pero ‘lastimamente mester bisa cu pa adulto ta midie pa 80%’. E ta bisa cu esey ta nifica un problema na Aruba cu malesa cronico.

El a duna di conoce cu den pasado Wit Gele Kruis a duna idea of haci proposicion pa conseho di AZV conhuntamente cu minister anterior, pero mucho no a wordo haci. “Nos a wak cu e problema tabat’ey, pa bin cu e proyecto di scolnan saludabel cu ta cana awendia.”

E plan tabata pa expande na mas scol pa asina tur ta saludabel. Mirando cu ta problema di 50% muchanan riba 12 aña tin sobrepeso lo bira ideal pa tur scol na Aruba por tin e sistema aki.

E miho idea ta pa inverti den e muchanan awo y pa nan no bay perdi, pa den futuro nan no mester haya un malesa cronico, malesa di curason of cholesterol. Ya caba AZV no por carga cu e peso di tur malesa cronico, y si e muchanan ta desaroya e malesanan aki, ta bira un peso mas grandi.

“Mas cos saludabel mester bin. Pa motibo di investigacion aki por detecta problema cu sobrepeso mas trempan”, Goeloe a bisa. Pa locual ta trata e investigacion, e ta bisa pa hende no kere ta algo straño ora nan acerca e consultative burea, pero ta solamente pregunta extra y cu tur cos lo keda confidencial.

Di e forma aki tin un miho futuro pa comunidad. E ta bisa cu ta aplaudi tur persona di WGK pa e colabora, e dokter y tur studiante ta cla pa cuminsa cu e investigacion.