Recientemente den diferente medio di comunicacion a bin dilanti e noticia cu algun persona di Stichting Sportsubsidie Aruba (SSA) a keda suspendi pa motibo di iregularidadnan pa loke ta trata uso di algun fondo. Durante conferencia di prensa ayera mainta, minister demisionario di Enseñansa y Deporte, Endy Croes a elabora riba e tema y a aclaria algun punto.

Segun loke e mandatario a indica, na comienso di e luna aki e presidente di Conseho di Supervision di SSA infrom’e cu nan a detecta cierto supuesto iregularidad y e minister di biaha a duna instruccion pa cuminsa cu un investigacion pa tin claridad den esaki.

El a splica cu a indica na su persona cu probablemente e director di SSA ta e persona cu tabata encarga cu e iregularidadnan aki. Na e momento ey, e director di SSA no tabata na Aruba. El a yega 10 di september y e siguiente dia, 11 di september, Conseho di Supervision a yama e persona aki aden y segun e Conseho a informa, nan a suspend’e mesora y a tuma su pertenencianan, ipad, laptop, yabi, etc. y aworaki ta keda pendiente pa e investigacion.

Minister Croes a splica cu ta trata primordialmente di tres nomber cu lo tabata haya cierto fondonan pa organisa algo deportivo cu aparentemente nunca a tuma luga. El a indica cu no tabata un biaha, pero varios biaha cu e tres nomber aki a bin dilanti.

“Ta trata di pagonan cu lo a bay pa tres persona specifico na mas cu un ocasion riba supuesto peticionnan pa deporte, cu segun informacion, nunca a tuma luga, y esey e investigacion ta basa su mes riba dje. Esey ta e liña cora cu a lanta e sospecho y a haci investigacion den e parti aki,” Croes a indica.

E mandatario a resalta cu otro medionan di comunicacion a culpa varios minister pa loke a sucede, pero el a aclaria cu ningun minister ta envolvi den e parti aki y cu ta algo hopi recien.

Croes a agrega cu e Conseho di Supervision a informa cu esun encarga a admiti por escrito su culpabilidad y cu e investigacion lo determina e proceso cu mester cana.

E mandatario a indica cu e no tin conocemento di ken e tres persona aki ta.

Minister Croes a clarifica cu SSA ta un stichting riba su mes y tin un two-tier model. E tin un Conseho di Supervision, cu ta controla y e tin e directiva cu ta haci operacionnan.

El a splica cu e placa ta bay pa federacionnan y pa añas caba, banda di e placa cu ta bay pa federacion, nan tin un fondo tambe disponibel pa Premio Excelencia den Deporte (PED), tin otro fondo pa organisacion di Weganan Escolar (WE) Aruba y tambe tin otro fondo pa Weganan Interinsular.

Por ultimo e minister demisionario di Deporte a sigura cu tur federacion cu a haci peticion pa nan proyecto pa 2024 y a haya aprobacion desde januari pa henter e aña, tur esey lo keda tuma luga. “A actua corecto, a proteha e fondonan di SSA pa tur federacion, a bin cu medidanan interno pa esaki no ripiti y ta mas cauteloso den tipo di maniobranan asina,” el a resalta.

Comunicado Aruba Sport Uni (ASU)

Diamars ultimo ASU, a traves di un comunicado di prensa, a aclaria e informacion y informa tur nan federacion miembro, mundo deportivo y comunidad general di e situacion. Nan a trece pa dilanti tres punto.

Prome nan a aclaria cu e directiva actual di ASU a ser eligi door di un proceso democratico den un Asamblea General. Di dos nan a remarca cu cada miembro di directiva a ser postula pa un federacion miembro di ASU. Y ultimo nan a subraya cu minister di deporte no por nombra miembro den e directiva di ASU.

Aunke minister Croes no a divulga nomber di ningun persona cu ta envolvi den e iregularidadnan aki, den su comunicado ASU ta informa cu e persona cu a wordo retira pa motibo di situacion andando ta Sr. K. Vrolijk.

“Nos di Directiva ta lamenta e situacion cu ta pasando y ta aclaria cu nos a distancia di e sucedido y cu Sr. K. Vrolijk a haya su retiro como tesoro na momento cu a haya sa di e situacion,” e comunicado a finalisa.

Bon Dia Aruba a tuma contacto cu e presidente di SSA, Soraida Boekhoudt, pero no a logra concretisa niun respuesta prome cu e ciere di edicion.

Peticion reunion publico parlamento

Relacion cu e tema aki parlamentario y lider di fraccion MAS, Marisol Tromp, parlamentario di fraccion MAS Aquannette Gunn y parlamentario y lider di fraccion ACCION21 Miguel Mansur a manda un carta pa presidente di parlamento, Raymond Kamperveen, pidiendo un reunion publico cu caracter di urgencia riba e investigacion di e iregularidadnan cu a sucede den SSA.

Den e carta e parlamentarionan ta splica cu Parlamento di Aruba a ricibi e rapport di Algemene Rekenkamer Aruba (ARA), titula “Op afstand, maar toch dichtbij” y cu den e investigacion aki caba ARA a constata cu tin iregularidadnan den fundacion SSA, cu por lo menos nan no tin reglanan na ordo y no ta tene nan mes na reglanan ni e statutonan di e fundacion.

“Teniendo na cuenta cu SSA ta un fundacion cu a ser crea desde aña 2016 y ta ricibi subsidio di miyones for di Fundacion Lotto pa Depore (FLPD) pa aña, y pa 2024 a ricibi e suma record di 9 miyon florin na subsidio, ta di vital importancia pa parlamento wordo informa door di e minister encarga cu Educacion y Deporte, Sr. Endy Croes riba e ultimo desaroyonan den e fundacion aki,” e carta ta subraya.

Pa e motibo aki e tres parlamentario ta haya necesario pa haci peticion na presidente di parlamento y pidi un reunion publico cu caracter di urgencia pa minister Croes aclaria tocante e investigacion di e iregulairdad den SSA.