Ayera mainta Minister di Enseñansa, Ciencia y Desaroyo Sostenibel, Rudy Lampe a bisa cu e preparacion pa legalisa e uzo di cannabis medicinal y hemp ta den ‘full swing’ na Aruba.

A pesar cu tin cierto desaroyo riba e tereno aki den nos region, e mandatario a sigura cu gobierno tin bon contacto cu Corsou y St. Maarten, ya cu nan a cuminsa tuma e prome pasonan. El a bisa cu ya caba su colega di Salubridad Publico a presenta parti di e plan pa legalisa cannabis medicinal cu a keda aproba den Conseho di Minister. E siguiente paso tin di haci cu e mester bay Parlamento, y e ta spera cu pronto nos organo legislativo lo trata e cambio di ley pa bin cu e legalisacion aki.

Inversionistanan interesa.
Tambe e mandatario a referi na e biahe cu un delegacion di Aruba, encabesa pa nos Prome Minister, Evelyn Wever-Croes, a realisa siman pasa na New York. El a menciona dos logro concreto: Un di nan tin di haci cu e discurso cu el a hiba, y despues e reunion cu 600 inversionista representantenan di companianan grandi y chikito cu tabata presente den e encuentro riba cannabis medicinal y hemp, ya cu nan ta considera nan como e ‘business di futuro.’

E acto aki a bira un exito -segun e mandatario- unda te hasta un trofeo a wordo entrega na Wever-Croes, mustrando cu ‘gabinete Wever-Croes ta comprometi y ta bay realisa e plannan aki pa loke ta cannabis medicinal y loke ta industria di hemp,’ segun Lampe.

El a informa cu probablemente pa fin di luna di october un delegacion lo bini for di Merca, ya cu gobierno di Aruba ta planeando conhuntamente cu nan pa bin cu un congreso internacional na 2020 pa sigui delibera riba e topico aki.

Nan tabata interesa den henter e negoshi di cannabis medicinal y industria di hemp y pa Aruba por funciona como un sorto ‘showcase’ den e tereno aki. Den e encuentro cu e empresarionan di Merca, nan a bisa cu e ‘bolo ta asina grandi’ pa loke ta e oportunidad economico cu e industria aki tin, segun Lampe.

Lampe a bisa cu den presencia di nos Rey, Willem Alexander y nos Reina Maxima, el a yega trece dilanti e topico aki cerca e delegacion di Hulanda, encabesa pa Prome Minister Mark Rutte. Tambe e por mira cu di parti di Reino Hulandes tin hopi expectativa pa loke ta e industria nobo aki. Ya cu den e combersacion cu a wordo sosteni cu e inversionistanan na Merca, a sali na cla cu den e negoshi aki tin espacio pa tur hende. Pues no mester pensa cu lo por surgi competencia cu otro partnernan den Reino. “Tin espacio pa tur hende, pasobra ta trata di un industria gigantesco,” el a bisa.

Otro logro tabata cu nan a reuni cu New York University y -segun e mandatario- e universidad aki ta hopi positivo pa sigui cu e cooperacion existente cu Instituto Pedagogico Arubano (IPA). Nan a papia pa amplia e forma di cooperacion cu otro institucionnan academico di Aruba, pa bin cu tur experticio cu nan por ofrece nos.