Inversionistanan di Acqua Condominiun cu awor ta Hotel Radisson Blu: “Pakico desaroyado no kier cumpli y ni gobierno ni instancianan no ta haci nada?”

E pesadiya ta continua pa Adrian, su casa Susana y otro inversionistanan: 14 aña y ainda nan no por haya e propiedad cu nan a cumpra, maske nan tin sentencia di corte di prome instancia y sentencia di HOF cu ta ratifica e decision cu Acqua Condominum mester entrega e propiedadnan cu nan a cumpra 14 aña pasa.

Manera Bon Dia Aruba ta bin denunciando for di luna di februari, na aña 2009 Adrian Bianchi y Susana Matteo, un pareha di nacionalidad Argentino, a dicidi di cumpra dos apartamento na loke tabata e proyecto di Acqua Condominum cu awor ta Hotel Radisson Blu. Pero awo tin un situacion basta desagradable ta andando cu nan. Unico cos cu nan tabata kier tabata pa bin Aruba pa pasa vakantie y hasta algun luna den apartamentonan cu nan a cumpra cu hopi ilusion den e isla mas bunita den Caribe, Aruba. Pero nan soñonan a bira un pesadiya. Un inversion di miles di dollar cu a laga nan sinti frustra, debi cu niun instancia na Aruba ta duna nan oido y tampoco ta haci nada pa nan por haya loke nan a cumpra, loke ta di nan segun ley.

Tempo ta pasa y nan no ta mira un solucion. Unico solucion cu e desaroyado, di nomber Venancio Gonzalez, a presenta na nan ta e firma di un adendum cu ta duna na e desaroyado e terenonan rond di e propiedad, y nan como doño solamente por huur por medio di Hotel Radisson Blu. Ttambe nan mester a entrega e casa club y pool cu a cobra cu 50% di e balor di e apartamentonan cu nan a paga 14 aña pasa.

Bianchi y Matteo ta un pareha cu ta biba na Argentina, cu no tin e posibilidad di bin Aruba cada luna pa mira con na e isla aki no ta cumpli cu ley. Nan a bati na porta di diferente abogado y di diferente medio pa asina trece e inhusticia aki dilanti.

Den un combersacion reciente cu Bon Dia Aruba, nan a informa cu nan haya un oferta di compra pa asina nan por recupera nan inversion, pero esey no ta suficiente compara cu loke nan a paga cu ta casi 400.000 dollar y cu awor ta balorisa cu 700.000 dollar – segun e mesun desaroyado a señala den ultimo sentencia. Nan no por haya menos cu esey despues di warda 14 aña, y durante e tempo aki Aruba crece como isla y prijs di propiedadnan tampoco ta igual cu e aña ey.

Tin un situacion basta delicado tumando luga den esaki, unda Biamchi y Matteo ta puntra nan mes: “Con por ta posibel cu por keda sin cumpli cu un sentencia di Corte di Prome Instancia y un ratificacion di HOF, si nos no ta firma un adendum? Ken a duna e poder na e desaroyado di e proyecto aki pa no entrega nos propiedadnan maske tin dos sentencia? Minister di Turismo, Dangui Oduber ken a sinta cu e desaroyado di e proyecto aki Venancio Gonzalez y hasta saca potret cune na 201 ta al tanto di e situacion aki y no ta duna cara na nos como inversionistanan.” Lamentablemente, manera nan a sigura varios biaha, nan no kier haya sa di Aruba mas pa motibo di e malcontento cu nan tin pa e situacion aki.

Hotel Radisson Blu ta un proyecto cu a keda bandona pa 7 aña y tabatin como obhetivo pa ta un di e condominionan mas luhoso den area di Palm Beach. Despues cu a haya un desaroyado, esaki a bira un hotel na aña 2021.

Mesun situacion aki ta sucediendo cu otro inversionistanan di nacionalidad Canades y otro di nacionalidad Venezolano, manera Heberto Gamero y Jose Potenza, dos persona di ken Bon Dia Aruba tambe a trece dilanti nan declaracion. Aunke Gamero si a firma e adendum pa por bende e propiedad, el a bisa “nos a dobla, nos a accede di duna poder na e desaroyado pa e bira doño di e parcelanan lateral sin pago algun, incluyendo e pool y casa club den cual lo a forma un hunta di condominio nobo pa por opera e edificio den man di Radisson Blu, pa no huur nos apartamento sino unicamente via e hotel, cu decoracion y mueblenan di e hotel. Tur esey a cambio di e propiedad. Nos kier bend’e pero nos no a logra, poco hende kier biba den un hotel, pero inversionistanan cu a mustra interes no ta di acuerdo cu e idea cu e empresa desaroyado, awor representante di e hotel, y propietario di e mayoria di apartamento. Nan ta ofrece 43% di e huur pero gastonan di condominio y ekipamento ta calcula na 43.000 dollar cu ta bay pa e propietario, incluyendo seguro y mantencion. Esaki por trece perdida pa inversionistanan y no ta yuda den e benta di e propiedadnan, pa loke nos a pidi pa reconsidera esaki y te awor nos no a haya contesta.” Gamero a señala.

Na april di aña 2021, hotel Radisson Blu a habri su portanan. Gamero y su casa, consciente di e permisonan di habitabilidad cu concede, a dicidi di bin Aruba cu e intencion di firma e documentonan di propiedad, pero esey no tabata posibel, segun Gamero a afirma. E desaroyado a nenga di firma esaki debi cu nan no tabata acepta pa firma loke e desaroyado tabata solicita.

Gamero y su casa a keda tres luna na Aruba na unda cu nan a dicidi di bay sin e documento di propiedad.

Na october di 2021 nan a haya e famoso y definitivo “adendum”, un documento igual cu esun cu nan a haya na 2020 pero mas formal. Gamero y su casa, cansa di warda asina tanto tempo pa firma y haya nan apartamentonan, a dicidi di firma e adendum aki aceptando e condicionnan cu e hotel tabata impone, como por ehemplo: huur e apartamentonan na e desaroyado so, na unda nan mester a pone tur mueblenan igual cu e hotel, sin fiha e porcentahe di huur cu Gamero mester haya cu esaki.

Di su parti, Jose Potenza ta un hende grandi di mas 80 aña di edad, ken den su soño tambe tabatin e ilusion di bin Aruba pa pasa un temporada dushi. E ta describi e situacion aki manera “un caminda di cruz.”

El a bisa cu te ainda e tin speransa pa leynan di Aruba lo wordo cumpli “mi no ta considera husto ni logico cu e hendenan aki ta bin condiciona mi pa duna mi loke ta di mi, cu e denuncia aki mi no kier daña ni un hende, mi kier mi placa bek pa mi por cumpra algo otro na Aruba pasobra mi soño ta pa mi pasa mi ultimo dianan na Aruba, mi a perde hopi aña di mi bida wardando pa esaki y mi no kier sigui haci negoshi cu Acqua tampoco, Aruba ta cay bao leynan di Hulanda pero nan no a haci nada legal ni husto cu nos, autoridadnan mester investiga Acqua y Radisson cu e casonan di nos,” el a finalisa.