Inversionistanan den disputa contra Acqua Condominium Aruba cu na final a bira Radisson Blu

Pa mira tur documento relevenate click aki

Na aña 2009, Adrian Bianchi y Susana Matteo, un pareha di nacionalidad Argentino a mira na Aruba e oportunidad di haya e luga di nan soñonan pa bin bishita den temporada di vakantie, sin sa cu añanan despues e lo bira nan pio pesadiya.

Den un entrevista pa Bon Dia Aruba, Bianchi y Matteo a conta via video call cu nan tabata mira Aruba como un luga pa bin den nan dianan di descanso. Nan a dicidi di bende nan pertenencianan – entre nan un cas – pa asina cumpra dos apartamento na Acqua Condominium Aruba, e cual tabata describi como un condominio priva di luho ubica na Palm Beach. Pero añanan despues, esaki a bira loke awor ta Radisson Blu Hotel.

“E oferta tabata hopi atractivo, pasobra a nos mester a bira 100% e doño y den e contract e bendedonan tabata lesa nos cu ademas di ta 100% doñonan di e apartamentonan, tabata inclui amenities, tereno, parkeer, pool, casa club, entre otro, cu nos por a dispone di esaki libremente, sea pa huur, presta pa otro hende of nos mes usa nan como stranhero y keda pa seis luna,” Matteo a bisa.

En todo caso, e bendedonan tabata sigura cu e propiedad tabata hopi facil pa huur ya cu ta ubica den areanan mas exclusivo y turistico di Aruba.

Pa e motibo aki, nan a bende nan pertenencianan pa cumpra e dos apartamento, pa den futuro nan por a disfruta di esaki tempo cu nan retira di nan trabao, y cu esaki por bira un inversion cu tambe por a bira un negoshi pa nan. Pero henter e proceso a cana hopi slow, manera Matteo a comenta.

Nan tambe ta conta cu nan a mira cierto propiedad na Tierra del Sol, pero segun a afirma, nan mester a entrega e 40% di e propiedad siendo cu na Acqua supuestamente nan tabata doño 100% completo di loke nan a cumpra.

Den e contract cu nan a firma ta indica cu tabata trata di torennan residencial di vivienda, y e bendedo tabata bisa nan tambe na e momento ey “cu esaki nunca ta bay ta un hotel ni casino, nan tabata sigura nos esey,” Matteo a expresa.

Pero como e proceso tabata bayendo hopi slow, na 2015 nan a dicidi di solicita back e inversion cu nan a haci, di casi 400.000 dollar, den un carta skirbi y redacta pa e abogado na e momento ey, Chris Lejuez, di ken nan no a ricibi un contesta pa e solicitud di haya nan placa back.

“Pa e motibo aki nos a dicidi di bay Aruba y nos a haya e sorpresa cu nan a bende e proyecto na un empresa desaroyador nobo. E persona cu a atende cu nos a bisa nos cu ta bay haci algun cambio na edificionan, pone e condominio mas bunita y cu den un aña nan lo caba e proyecto cu un plan di huur, na unda e persona aki tabata na cargo di esey pa huur nos apartamento, pero cu tambe nos tabata liber di drenta den e sistema ey si of no.”

Pero añanan tabata sigui pasa y e edificionan tabata tarda. Nan a busca otro abogado y a sigui inverti den e proceso aki pa exigi e entrega di nan apartamentonan y algun compensacion, pa motibo cu den e contract ta indica cu solamente tabata coresponde na nan e cifra di 5%. “Nos ta compronde esey, pero 5% di compensacion pa un proceso si tabata di seis luna of maximo un aña. Pero di tanto aña asina, nos tabata kier otro compensacion. Y abogado a bisa cu esey tabata posibel, pa haci e demanda y asina ta cu e contract cu nos tin aworaki tanto Acqua como nos a presenta na Corte di Husticia di Aruba, na unda a dicidi cu nan mester a entrega nos e apartamentonan y tur e areanan social manera e contract ta regarda,” Matteo ta enfatisa.

Na 2019, dies aña despues cu nan a inverti tur nan placa nan dicidi di bin Aruba back, nan a haya sa cu e luga a bira un hotel. “E señor aki, cu ta doño di mayoria di apartamentonan, Venancio Gonzalez a firma un contract cu Radisson Blu di e cual nunca el a informa nos, cu e luga lo bira un hotel. El a haci un contract sabiendo cu tabatin 30 persona cu a cumpra den otro condicionnan. Dicon nunca e no a informa nos si nos tabata di acuerdo cu e hotel?” Bianchi a sigura.

Di esaki, ta existi e sentencia AUA201901701 cu fecha 07 di october di 2020 y siguientemente tin otro sentencia di fecha 13 di januari di 2021 na unda hues a indica cu di acuerdo na loke e contract ta bisa, e desaroyado tin cu entrega e apartamentonan pero na e momento ey, tanto Matteo como Bianchi a haya e 5% back y e lunanan a sigui pasa sin cu nan por haya nada mas.

Nan a dicidi di bay Corte di Apelacion di acuerdo na e conseho di nan abogado na unda HOF di Corsou a ratifica e sentencia anterior pa nan haya 5% back y nan propiedadnan tal cual manera e contract ta indica.

No conforme cu esaki, Matteo y Bianchi ta sigura cu e persona aki kier a obliga nan di firma un extension di e contract (adendum) den cual nan mester a duna na dje e terenonan rond y cu nan como doñonan solamente por a huur por medio di e hotel Radisson Blu, na cambio Matteo y Bianchi mester a entrega e casa club, pool, di e cual tur esey a wordo cobra cu 50% di e balor di e apartamentonan cu nan a paga caba.

“Pa e por entrega nos e apartamentonan nos mester a firma e anexo ey, pero nos a cumpra e propiedadnan ey, nos ta nenga di firma esey pasobra nos tin cu traspasa gratis e mita di loke nos a paga y e otro punto ta cu nos no por huur como doñonan pasobra e Sr. Gonzalez ta bisa cu nos por causa un daño na su proyecto y nos no tin e intencion ey, simplemente loke nos kier ya cu nos no por ta doñonan como tal sin firma e anexo, pa e haci nos un oferta y cumpra for di nos e propiedad na un prijs rasonabel pasobra nos a purba di yega na un acuerdo pero, tabata absurdo, nan kier a duna back e mesun cantidad di placa di 14 aña pasa,” nan a señala.

Pero Matteo y Bianchi no ta e unico personanan afecta, tin mas o menos 14 persona cu a firma e anexo debi cu nan ta sigura cu nan no a haya un otro opcion, “si nan no tabata firma cu e adendum, nan no tabata haya nan propiedad.”

Ademas, di Matteo y Bianchi Bon Dia Aruba tambe tin conocemento di dos persona mas cu a wordo afecta pa e proyecto aki, Heberto Gamero y Jose Potenza ken nan tin e mesun cantidad di aña wardando, nan ta hende grandi awor cu a soña di disfruta di e propiedad cu di tanto aña di trabao nan a logra cumpra pero cu e transcurso di e tempo nan a cansa di warda, nan a cansa di e presion di parti di e compania desaroyado y nan abogadonan, manera Gamero a sigura.

Aunke al contrario di Bianchi y Matteo, Gamero si a firma e adendum pa por bende e propiedad “nos a dobla, nos a accede di duna poder na e desaroyador pa e bira doño di e parcelanan lateral sin pago algun, incluyendo e pool y casa club den cual lo a forma un hunta di condominio nobo pa por opera e edificio den man di Radisson Blu, pa no huur nos apartamento sino unicamente via e hotel, cu decoracion y mueblenan di e hotel, tur esey a cambio di e propiedad, nos kier bend’e pero nos no a logra, poco hende kier biba den un hotel pero inversionistanan cu a mustra interes no ta di acuerdo cu e idea cu e empresa desaroyado awor representante di e hotel y propietario di e mayoria di apartamento, nan ta ofrece 43% di e huur pero gastonan di condominio y ekipamento ta calcula den 43.000 dollar cu ta bay pa e propietario, incluyendo seguro y mantencion, esaki por trece perdidanan pa inversionistanan y no ta yuda pa e benta di e propiedadnan pa loke nos a pidi pa reconsidera esaki y te awor nos no a haya contesta,” Gamero a bisa den un declaracion pa Bon Dia Aruba.

Ta keda di parti di instancianan y Gobierno di Aruba pa tuma carta den asunto aki, di e cual e parlamentario di partido Accion21 Miguel Mansur tambe a cuminsa trece e situacion aki dilanti y a manda algun preguntanan na prome minister Evelyn Wever-Croes.