Recientemente Sra. Rosa Nurys Godet, CEO di Exploitatie Maatschappij Reveillon Aruba N.V a haci un rueda di prensa unda cu el a haci algun comentario tocante inversionistanan cu ta optando pa no inverti den Aruba pa motibo cu nan ta enfrenta obstaculo grandi sin necesidad.
Sra. Godet a comenta cu pa Exploitatie Maatschappij Reveillon Aruba DIP, encarga cu infrastructura di Aruba, ta birando un obstaculo cu ta blokiando nan desaroyo. El a splica cu nan ta un ekipo di inversionista cu a bini Aruba desde aña 2014 cu e intencion di yuda y contribui na e desaroyo, siguridad y mehoracion di e isla.
El a convoca e rueda di prensa pa trece dilanti un preocupacion di no solamente Rosa, sino tambe di tur e miembronan di e ekipo di inversionista. El a conta cu el a “yega e fin di purba reuni cu y ricibi un contesta di DIP y e ta imposibel.” Segun e ta conta, tin varios inversionista internacional cu su persona mes a trece e isla, cu a retira y/of a opta pa no sigui inverti den esaki mas pa motibo cu tin un gran cantidad di proyectonan y desaroyo cu ta keda pega pa falta di un solo papel of firma. “Mi a mira varios proyecto keda pega sin por sigui, djis pa causa di warda un firma.”
El a menciona e proyecto specifico cu nan tin desde aña 2014 ta purba di ehecuta, cual ta un proyecto na Sabana Blanco. Nan a ricibi firma, aprobacionnan y algun di nan a colapsa pa causa di cambio di director, el a splica cu el a “reuni cu e director di DIP y mi ta aprecia cu e ta un persona amigabel pero nos tin cu sigui desaroya e Isla y nos no por continua. Inversionistanan tin e opcion di bay for di e isla y inverti otro caminda. Mi a mira e isla keda sin camber pa e luna di october den aña 2022.”
Sra. Godet a comenta tambe cu el a topa varios biaha cu e Prome Minister, sinembargo no tabata e momentonan oportuno pa papia tocante e topiconan aki, sinembargo si el a comenta cu e no tin ningun relacion cu partidonan politico, bisando cu “nos no ta den ningun linea politico, nos ta inversionista cu ta buscando e miho pa e isla y nos kier sigui crece y haci un diferencia riba e isla. Nos a haci varios proyecto chikito y donacion chikito pa embeyece e isla manera e donacion pa e rotonde na Saliña Cerca. Nos ta un ekipo di inversionista cu kier crece y mira un isla yen di flor, felicidad y desaroyo cu lo atrae turista.”
Hopi inversionistanan tabata kier pa Sra. Godet haci e rueda di prensa pa motibo cu un hende mester para y bisa cu “DOW y DIP mester uni y tin un bon comunicacion. Bo tin mester di un ekipo, no tin proyecto ni pais cu lo crece si no tin un ekipo. Sin ekipo y comunicacion e pais no por crece.” E comunicacion y ekipo ta loke por hiba Aruba na un siguiente nivel segun Rosa.
Aruba ta depende riba turismo, y segun Godet el a sugeri varios idea na gobierno pa cu tur e proyectonan cu a ser laga na mita, “nos tin cu completa e proyectonan aki paso of bo ta haci algo y completa esaki of no haci nada. Laga e bestianan disfruta di e tereno.”
Rosa Nurys a critica cu tin asta localnan ta bay DIP cu no por haci algo cu nan tereno pa falta di e firma di un director di algun departamento. Tin demasiado proyecto na Aruba sin caba, y esaki no ta e manera pa desaroya un pais. “Duna inversionistanan e oportunidad di trece dilanti nan preocupacionnan. Despues di 4 aña porfin nos tin un reunion. Mi tin añanan na Aruba y desde cu tin un director nobo na DIP mi a mira e homber aki un of dos biaha.”
El a expresa cu e tin un proyecto aproba di DOW pa Sabana Blanco, cu tur e documentonan necesario sinembargo nan no por cuminsa pa falta di e firma di director di DIP.”Mi no ta bay inverti ni un dollar ni un florin sin e carta aki paso sino mi lo ta siñando mi yiunan con pa haci e cosnan di e manera incorecto,” el a declara. Segun el a splica, te ainda e tereno no a ser transferi completamente na nomber di e inversionista. Aparentemente e carta a keda aproba pa un director ken despues a keda retira y awo mester warda e firma di otro, “un sistema ta sigui cana mientras e otro ta keda para. Nos no por traha di e manera aki. Mi ta bay DOW nan ta bisa falta algo di DIP, despues bo ta bay DIP nan ta bisa nan no tin algo di DOW, y asina bo ta keda bay y bin.”
Sin e firma di e director di DIP, e proyecto no por cuminsa pa motibo cu e tereno no ta completamente den nan man y nomber y Bon Dia Aruba a acerca DIP pa comentario, sinembargo te ainda no a haya contesta.
Sra. Godet a clausura bisando cu e ta spera cu Gobierno por tuma esaki den consideracion y mira cu tin hende cu ta aprecia y balora Aruba y su pueblo” pero tin mester di un miho sistema pa por opera den su bienestar.
