Na december EcoGas a cuminsa cu instalacion di e tankinan grandi pa almacena LPG gas, pa bende cu comercio di nos isla. Pa por abastece e demanda, EcoGas a adkiri tankinan grandi, capaz pa tur momento tin suficiente gas pa cumpli cu demanda di mercado.

E tankinan instala na Barcadera ta instala strategicamente pa barconan por mara y via un tubo transferi e gas pa e tankinan. E luna aki a keda cla cu instalacion di e tankinan y dialuna a habri cu yegada di e prome barco di LPG pa cu a bin descarga gas pa EcoGas.

 

E tuberia ta di 310 meter y a dura seis luna pa traha riba e instalacion, cu ta inclui tanki y tuberia y tur instrumentacion. George de Nobrega, Gerente General di EcoGas, a indica cu e prome barco cu nan a haya, ta pa trece un cargamento di 1.3 miyon liter di LPG Gas. E gas ta p’e mercado comercial di Aruba y pa awo ta want’e te eynan. E proyecto aki tin un inversion di mas cu 6 miyon florin.

 

E rol di e compania Admiral LPG Services di Panama tabata pa diseña y construi e facilidad. Jose Morales, presidente di Admiral LPG Services, a indica cu nan a haci tur trabou di ingenieria y logistica. E construccion di e planta tabata haci door di un compania Arubiano mes y esey ta algo di hopi orguyo pa Aruba. E ta un transferencia di tecnologia hopi importante, pasobra ta keda personal cualifica pa tipo di obra asina aki.

E idea tabata di algun tempo caba pero ora MetaCorp a opta pa aumenta inversionnan den pandemia, e proyecto aki a bin na luz di dia atrobe. A start den luna di november 2020, unda a cuminsa cu cumpramento di ekipo y material. A termina cu e trabou den luna di mei ultimo.

 

Admiral LPG Services ta na Aruba pa supervisa e prome ‘descarga’ y tambe pa ofrece mas entrenamento na e personal. A haci esey na momento cu a traha e prome facilidad. Tambe awo ta den e parti di training y pa laga tur cos cla, p’asina hende local por traha. Morales ta orguyoso di e proyecto y a felicita comunidad di Aruba, pasobra esaki ta un avance importante pa loke ta economia di e pais y ta trece hopi beneficio p’e consumidonan.

 

E inversion aki ta hisa e capacidad di EcoGas pa suministra e mercado local cu gas. Cada tanki ta di 120 mil galon, pero awo a hisa na 360 mil galon. EcoGas tabatin dos tanki chikito di 30 mil galon, pero cu e adkisicion nobo, ta pone cu e capacidad a aumenta te na 420 mil galon di gas.

 

Eddie de Veer, director di MetaCorp ta mira e proyecto cu hopi orguyo, pasobra ta mira final di un idea, cu a converti den un plan, den un proyecto y cu awor ta den pleno ehecucion y operacion.

“Nos ta consciente di nos responsabilidad corporativo y cu comunidad ta conta cu nos ta sigui inverti y desaroya. Nos ta hacie pasobra nos ta Arubiano y nos semper a para cu nos schouder bou di nos economia ora mas nos pais tabatin mester”, asina Eddie de Veer a sigura.

E ta corda e rol di su welo tempo cu LAGO a bin establece na Aruba y despues di su tata, ora cu LAGO a cera y cu nos pais a bay den turismo. Ta e ora ey MetaCorp a dicidi di, banda di nan negoshinan di cine y refresco, pa sigui den e industria di concret, di hotel, di cerbes, di desperdicio, den laundry y awo tambe den negoshi di gas. “Den e discurso di mi tata na celebracion di 100 aña di MetaCorp, el a anuncia cu e compania ta cla pa e siguiente 100 añanan di crecemento y desaroyo. Y e tabatine den serio”, asina Eddie de Veer a termina bisando.

MetaCorp, como compania madre di EcoGas tabatin palabranan di elogio so y admiracion pa e trabou duro cu e ekipo completo a desplega den preparacion y realisacion di e proyecto aki.